Atyraý oblysy, Inder aýdanyna qarasty Sáken Seıfýllın atyndaǵy orta mektebiniń 8-synyp oqýshysy Qajymuqan Muqatov sýdy jáne mıneraldy tyńaıtqyshtardy únemdeýge múmkindik beretin tamshylata sýarý qondyrǵysyn oılap tapqan, dep habarlaıdy almaty-akshamy.kz
«Basty nazarymdy tyńaıtqyshtardy únemdeı otyryp, sýdyń ósimdik tamyryna barýyna aýdardym. Oıym júzege assa, ónimdilikti arttyratynymdy túsindim. Tamshylap sýarý ádisiniń artyqshylyǵyn álem elderi jaqsy biledi. Osyndaı tehnologıanyń Qazaqstanda da damyǵanyn qalaımyn. Atyraý óńiriniń týmasy bolǵandyqtan, Jaıyq ózeniniń tartylyp bara jatqanyn jaqsy bilemin. Osy qondyrǵyny paıdalanyp, ózen ańǵarynyń ekojúıesin saqtap qalǵym keledi»,– dedi 8-synyp oqýshysy «Adyrna» portalyna bergen suhbatynda.
Áńgime barysynda daryndy oqýshy qondyrǵyny iske asyrýǵa muǵaliminiń kómeteskenin aıtty. Ustazynyń esimi – Ótepqalı Násipqalı. «Osy kisi ıdeıamdy júzege asyrýǵa kómektesip, baǵyt-baǵdar berdi. Osylaısha, qondyrǵyny oılap taptyq», - deıdi Qajymuqan Muqatov.
Qajymuqan Inder aýdandyq bilim bóliminiń oqýshylar shyǵarmashylyq ortalyǵyndaǵy «Sheber» úıirmesine 2017-2018 oqý jylynan bastap qatysady eken. Úıirme jetekshisiniń aıtýynsha, Qajymuqan – óte sabyrly, ańǵarympaz bala. Onyń armany – jeke kásipker bolyp, múmkindigi shekteýli balalarǵa kómektesý.