Mamandar bul jumystyń 45 kúnge sozylatynyn aıtyp otyr.
Atyraý munaı óńdeý zaýytynda tehnologıalyq qondyrǵylardy jóndeý júrgizilip jatyr, dep habarlaıdy Almaty-akshamy.kz.
«Atyraý munaı óńdeý zaýyty» JSHS baspasóz qyzmetiniń málimetinshe, 1 qazannan beri alǵash ret tehnologıalyq qurylǵylardy kezekpen jóndeý jumystary júrip jatyr.
«Qondyrǵylardy kezekpen jóndeý munaı ónimderin shyǵarýdy toqtatpaýǵa múmkindik beredi. Jóndeýdiń mundaı tásili Qazaqstandaǵy munaı óńdeý zaýyttarynda buryn-sońdy qoldanylmaǵan. Bul – Atyraý munaı óńdeý zaýytynyń tarıhyndaǵy eń kúrdeli jóndeý. Zaýytta buǵan deıin mundaı kólemdegi jóndeý jumystary bolǵan emes. Jóndeý uzaqqa sozylady. Qurylǵylardyń keıbiri 20 kúnge jýyq merzimde jóndeledi. Al, katalıtıkalyq krekıng prosesi júretin eń kúrdeli qondyrǵy 45 kúnge jýyq ýaqyt jóndeýde bolady. Biz tizbekti jóndeý tásilin qoldanýdamyz», -dep habarlady «QazMunaıGaz» UQ» AQ munaı óńdeý jáne munaıhımıa departamentiniń dırektory Dmıtrıı Makeev.
Onyń aıtýynsha, munaıdy bastapqy óńdeýge arnalǵan eki qondyrǵy bar. Tehnologıalyq qondyrǵylardyń bir tizbegi jóndeý toqtatylǵanda, ekinshi tizbegi jumys isteıdi. Sol sebepten, zaýyttyń jumysy tolyq toqtatylmaıdy. Jóndeý kezinde zaýyt 50-70%-ǵa teń qýatpen ónim shyǵarýdy jáne jóneltýdi jalǵastyra beredi.
«Aldaǵy ýaqytta zaýyt jóndeýdi kezeń-kezeńimen, bir jylda bir tizbekti jóndeýden ótkizýdi josparlap otyr. Jóndeýdiń mundaı júıesi munaı óńdeý kólemin ulǵaıtyp, ónimder sanyn arttyrýǵa múmkindik beredi. Osylaısha AMÓZ ishki janar-jaǵarmaı naryǵyna áserin azaıtyp, jóndeý jumystary kezinde áleýmettik mańyzy bar munaı ónimderin shyǵarýdy qamtamasyz etpek», -dep málim etti Dmıtrıı Makeev.