Atyraý-Astrahan avtojolynyń (824-833) shaqyrym arasy kólik qozǵalysy úshin ashyldy, dep habarlaıdy Almaty-akshamy.kz Atyraý oblysy Óńirlik komýnıkasıalar qyzmetine silteme jasap.
Atyraý – RF shekarasy (Astrahan) avtojolynyń Atyraý oblysyna qarasty ýchaskesiniń uzyndyǵy 217 shaqyrymdy quraıdy. Tasjol 4 ýchaskege bólingen. Onyń alǵashqy (824-833 shaqyrym arasy) 9 shaqyrym quraıtyn bóliginiń tómengi qabat jabyndysy arqyly kólik qozǵalysyna ruqsat berildi.
Jol tóseminiń eni – 9 metr, qalyńdyǵy – 57 santımetr. Joba aıasynda 220 maman men 163 arnaıy tehnıka jumyldyryldy.
Sondaı-aq joldyń boıynda ornalasqan eldi mekenderdiń tusyna mal ótetin ótkelder men avtobýs aıaldamalary, kólik turaǵymen qosa kópirler salynady dep josparlanǵan.
Eske sala keteıik, respýblıkalyq mańyzǵa ıe "Atyraý-Astrahan" tas joly boıynsha qaıta jańǵyrtý jumystary 2018 jyly bastaldy. 2023 jyly tolyqtaı paıdalanýǵa beriledi dep josparlanyp otyr.