Fýtboldan Qazaqstan quramasy Grekıadan ońbaı jeńildi.
Jazda Germanıada ótetin Eýropa chempıonatyna qatysamyz ba degen arman arman kúıinde qaldy dep habarlaıdy Almaty-akshamy.kz.
Prosports.kz-tiń málimetinejúginsek, Afınada azýly Grekıadan iri eseppen utyldyq. Bas bapker Magomed Ádıevtiń Qazaqstan quramasyn osy deńgeıge jetkizgenine daý joq. Biraq, Grekıa jerindegi machta qarsylas oılamaǵan júris jasaımyn dep qarsylasyn sharýasyn jeńildetkeni ishti qynjyltady.
Bastapqy quram tizimin kórgende birneshe suraq týyndady. Ortany Abzal Beısebekov, Baktıer Zaınýtdınov ekeýine tapsyrǵany tańdanys týdyrdy. Alǵy shepte Maksım Samorodov pen Islam Chesnakovqa kúmán joq, biraq Elhan Astanovty shabýyldaǵy úshinshi fýtbolshy pozısıasyna shyǵarǵany da kóńilge kúmán keltirdi. Ortalyq qorǵanystyń sol qaptalyndaǵy Nuraly Álipti oń qaptalda ǵana óziń jaıly sezinetin Temirlan Erlanovpen almastyrýdy jón kóripti. Qandaı maqsatpen kapıtan Asqat Taǵybergendi, Ramazan Orazovty, Islambek Qýatty qosalqy quramda qaldyrǵanyn Ádıev keıin túsindire jatar.
Ádıevten «tosyn syılar» alǵan grekter alǵashy on bes mınýtta mach taǵdyryn sheship tastady. Ian Vorogovskıı men Erlanovtyń qaptalynan bastalǵan shabýyl oń qaptalda penltımen aıaqtaldy. Kapıtandyq belgimen júrgen Abzal Beısebekov ortany ustaı almady. Pas bergende jańyldy, qarsylas shabýylyn buzyp jarytpady. Ulttyq quramadaǵy qaıbir jetistigi úshin Ádıev tireýshi jartylaı qorǵaýshy pozısıany berip qoıǵany ózińe ǵana aıan. Ekinshi, úshinshi, tórtinshi goldardy qarsylas Shaskııdiń aıyp alańynyń ishinen soqty desek te bolady. Úsheýi de sol qaptaldan keldi.
Ekinshi taım basynda qosalqy quramnan shyqqan Ramazan Orazov arqasynda shabýylǵa qan júrgirgendeı kóringen. Gol soǵamyz degen umtylys 10 mınýtqa sozyldy. Zaınýtdınov, Tapalov jáne Orazovtyń soqqylary qaqpaǵa darymady. Ian Vorogovskıı 5-6 metr jerden qaqpany dál kózdeı almady. 85-shi mınýtta gol soqtyq. Oǵan da jettik. Biraq, óz qaqpamyzǵa. Erkin Tapalov buryshtamadan keıin dopty Shaskııdiń qaqpasyna baǵyttap jiberdi.
Ádıev kapıtan Taǵybergendi Afınadaǵy machta shyǵarmaımyn dep áldebireýge sert bergen sekildi. Baby kelispeı tursa da Asqattyń ulttyq quramadaǵy úzdik jartylaı qorǵaýshy ekeni sózsiz. İshki birinshiliktiń eki machyna da qatysty. Jaman oınady dep aıta almaımyz. Gol soqpaǵan shyǵar. Zeńbirektiń oǵyndaı soqqylaryn azaıtqan shyǵar. Biraq, QPL-da alǵashqy týrda eki gol soqqan Astanov qandaı ónerimen tań-tamasha qyldy?
Eýropa chempıonatyna qol sozym jerge deıin jetip, buryn túsimizge de kirmegen nátıje úshin Ádıev bastaǵan komandaǵa alǵys sheksiz. Danıa úshin, Fınlándıa úshin, toptaǵy úshinshi oryn úshin rahmet! Ulttar lıgasyndaǵy birinshi orynnyń oryny bir bólek. Dese de, búgin machtaǵy taktıkasyna qarap synaý oryndy dep taptyq. Synnan sabaq alyp, Ulttyq quramanyń alda alar asýy bar ekenine, budan da joǵary bıiktikti baǵyndyraryna biz senbeımiz emes, SENEMİZ!
Endi, Grekıa ulttyq quramasy fınalda Grýzıamen Eýropa chempıonatynyń joldamasyn sarapqa salady. Qazaqstan Grýzıadan 0:2 esebimen utylǵan Lúksembýrgpen joldastyq mach ótkizedi.
Ulttar lıgasy. Jartylaı fınal
Grekıa - Qazaqstan - 5:0(4:0)
Gol soqqandar: Bakasetas, 9 - penaltıden (1:0); Pelkas, 15 (2:0); Ioannıdıs, 37 (3:0); Kýrbelıs, 40 (4:0); Tapalov, 86 - óz qaqpasyna (5:0)
Grekıa: Vlahodımos, Boldok, Mavropanos, Sımıkas, Bakasetas, Kýrbelıs, Madalos, Hasıdıakos, Masýras, Iannıdıs, Pelkas;
Qazaqstan: Shaskıı, Vorogovskıı, Erlanov, Marochkın, Bystrov, Qaıyrov, Astanov, Zaınýtdınov, Beısebekov, Chesnokov, Samorodov.
Esterińizge sala keteıik, keshe Freedom Holding Corp kompanıasynyń bas dırektory Tımýr Týrlov Qazaqstan fýtbol quramasyna ulttar lıgasynyń jartylaı fınaldyq pleı-off machynda Grekıa quramasyn jeńetin bolsa, 100 mıllıon teńge syıaqy beretinin habarlaǵan edik.