18 sáýirde Atom energıasy jónindegi halyqaralyq agenttiktiń bas dırektory Rafael Marıano Grossı Qazaqstanǵa keledi. Bul týraly BAQ ókilderimen ótken brıfıńte SİM resmı ókili Aıbek Smadıarov aıtty, dep habarlaıdy Almaty-akshamy.kz QazAqparatqa silteme jasap.
«18 sáýirde Atom energıasy jónindegi halyqaralyq agenttiktiń bas dırektory Rafael Marıano Grossı jumys saparymen Qazaqstanǵa keledi. Sapar barysynda Memleket basshysymen, QR Syrtqy ister, Energetıka jáne Densaýlyq saqtaý mınıstrlerimen kezdesedi, sondaı-aq Óskemendegi Úlbi metalýrgıa zaýytynyń aýmaǵynda ornalasqan agenttiktiń az baıytylǵan ýran bankine barady», - dep málim etti vedomstvonyń resmı ókili Aıbek Smadıarov.
Ol sonymen birge qazaqstandyq delegasıa 18-19 sáýir aralyǵynda Jenevada ótetin BUU-nyń Eýropalyq ekonomıka komısıasynyń 70-shi sesıasyna qatysatynyn aıtty.
Jıynnyń taqyryby – Eýropalyq ekonomıkalyq komısıa óńirindegi ornyqty damý múddesi úshin sıfrlyq jáne jasyl transformasıa.