Búgin Májilistegi Úkimet saǵatynda QR Eńbek jáne halyqty áleýmettik qorǵaý mınıstri Tamara Dúısenova QR Áleýmettik kodeksi jobasynyń negizgi baǵyttaryn tanystyrdy, dep habarlaıdy Almaty-akshamy.kz QazAqparatqa silteme jasap.
Mınıstr Áleýmettik kodeks jańa áleýmettik saıasatty qurýǵa negiz bolatynyn jáne onyń basty maqsaty - qazaqstandyq otbasynyń ál-aýqatyn kóterý men nyǵaıtýdyń bazalyq jaǵdaıyn qalyptastyrý ekenin atap ótti. Ony júzege asyrý úshin memleket, bıznes jáne azamattar arasynda jańa áleýmettik kelisimshart jasaý qarastyrylady.
«Áleýmettik kodeksti ázirleýde halyqaralyq tájirıbeler zerdelenip, elimizdiń ereksheligin eskere otyryp, negiz retinde Eýropalyq odaqtyń Áleýmettik kodeksi basshylyqqa alyndy. Kodekstiń jobasy 5 bólimnen, 19 taraýdan jáne 267 baptan turady. Birinshi novela – Otbasynyń sıfrlyq kartasy (OSK). Ol memlekettik organdardyń barlyq qoldanystaǵy aqparattyq júıeleriniń derekteri negizinde qalyptastyrylady», - dedi T. Dúısenova.
Osy oraıda onda 6,3 mln qazaqstandyq otbasy nemese 19,4 mln azamat týraly aqparatty qamtylady.
«Birikken Ulttar Uıymynyń Damý baǵdarlamasy usynǵan Alkıre-Foster modelin paıdalana otyryp, árbir otbasynyń ál-aýqat dárejesin anyqtadyq jáne olardy 5 sanatqa bóldik. Nátıjesinde, áleýmettik saıasat is-sharalarynyń otbasy ál-aýqatyn kóterýge qanshalyqty yqpal etkendigin, ıaǵnı tıimdiligin baǵaladyq. Sonymen birge otbasylarlarǵa jáne olardyń múshelerine qandaı memlekettik kómektiń túri qajet ekenin anyqtaýǵa múmkindik aldyq», - dedi mınıstr.
Vedomstvo basshysy OSK memlekettik áleýmettik saıasattyń orta jáne uzaq merzimdi mindetteri men baǵyttaryn aıqyndaý quraly bolatynyn atap ótti.
«Birinshiden, ataýly kómektiń máni ózgeredi. Endi ataýly kómek otbasyny nemese azamatty qıyn ómirlik jaǵdaıdan shyǵara alatyn ataýly shara retinde qarastyrylatyn bolady. Ekinshi ózgeris - qoldanystaǵy áleýmettik kontrakttyń jańa mazmunyna qatysty, ıaǵnı taraptardyń jaýapkershiligin arttyrý qaralyp otyr. Memleket naqty bir otbasynyń ál-aýqat dárejesine qarap, ataýly shara kórsetýge mindetti bolsa, ony alýshy otbasy bul sharalardy ómirlik qıyn jaǵdaıdan shyǵý úshin oryndaýǵa mindetti», - dedi Tamara Dúısenova.