Almatyǵa tanymal túrik akteri Býrak Ózchıvıt keldi
“Negiz: Osman”, “Sultan Súleımen”, “Boztorǵaı” syndy túrik serıaldarynda basty róldi somdaǵan álemge áıgili akter Býrak Ózchıvıt Almatydaǵy aýqymdy jobanyń tanystyrylymyna qatysty.
Akter Qazaqstandaǵy qurylys naryǵyndaǵy úlken kompanıalardyń biri — RAMS Global-dyń jańa bastamasyn qoldaý úshin Almatyǵa keldi.
Baspasóz konferensıasy barysynda Býrak Ózchıvıt jýrnalıserdiń suraǵyna jaýap berip, Almaty men jobadan alǵan áserin bólisti. Ol bul jobanyń resmı ambassadory retinde sóz sóılep, kompanıanyń halyqaralyq deńgeıdegi joǵary sapasyn erekshe atap ótti.
Býrak Ózchıvıt buǵan deıin de Almatyǵa birneshe ret kelip ketken. Áleýmettik jelilerdegi paraqshasynda «Ata-babalarymyzdyń jerinen sálem» dep jazba qaldyrǵan. Bul saparynda da qalanyń tarıhı jáne mádenı murasyna degen qyzyǵýshylyǵyn jasyrmady.
“Qazaqstanǵa keıingi 10 jyl ishinde jıi kelip júrmin. Ár kelgen saıyn bul eldiń azamattarymen shyǵarmashylyq baǵytta, túrli jobalar aıasynda birlese jumys isteý jóninde áńgimelestik. Munda meni árdaıym jyly qabyldaıdy, ózimdi týǵan úıimde júrgendeı sezinemin. Atajurtqa qaıta oralý — men úshin úlken qýanysh ári júrekke jaqyn sezim. Bul topyraq — bizdiń ata-babalarymyzdyń izi qalǵan kıeli jer. Qazaqstan meniń júregimde erekshe oryn alatyn elge aınaldy. Atajurtqa árkez kelýge daıynmyn”,- dedi Býrak Ózchıvıt.