Mınıstrdiń pikirinshe, balanyń úlgerimi men tártibin basqa adamdardyń kózinshe talqylaýdy toqtatý kerek.
Bilim jáne ǵylym mınıstri Asqat Aımaǵambetov ata-analar jınalysyn ótkizýdiń jańa formatyna kóshý kerek ekenin aıtty, dep habarlaıdy Almaty-akshamy.kz
«Barlyq mektep ata-analar jınalysyn ótkizýdiń jańa formatyna kóshýi kerek. Olardy jınap alyp, basqa adamdardyń kózinshe balanyń úlgerimi men tártibin talqylaýdan arylǵan jón. Onyń ornyna jeke, toptyq nemese ujymdyq formatta uıymdastyrǵan tıimdi», - dep málimdedi Aımaǵambetov apparat jınalysynda.
Mınıstrdiń aıtýynsha, árbir ata-anaǵa muǵalimnen óz balasynyń jetistikteri men álsiz tustary týraly tolyq aqparat alatyndaı jaǵdaı jasaý qajet.
«Ol úshin ata-analarmen qarym-qatynasty jańasha júrgizý mańyzdy», - dedi mınıstr.
Buǵan deıin Asqat Aımaǵambetov endi aǵylshyn tili 1-synyptan emes, 3-synyptan bastap oqytylatynyn málimdedi. Bul ózgeris bıyl birinshi qyrkúıekten bastap engiziledi degen jospar bar.