29 jasar azamatsha zeınetkerlerdi qorqytyp, zorlyq kórsetken.
Almaty polıseıleri týǵan ata-ájesine zorlyq kórsetken azamatshany sotqa jetkizdi, ákimshilik sot oǵan eskertý jasady, dep habarlaıdy Almaty-akshamy.kz.
Polısıa mamandarynyń aıtýynsha, birneshe aıdan beri Almaty qalasynyń Naýryzbaı aýdanynda turatyn zeınetkerler týǵan nemeresinen zorlyq kórýde. 1992 jyly týǵan S.esimdi azamatsha, búkil otbasyn úreıde ustap otyr.
«2021 jyly 28 mamyrda Naýryzbaı aýdanynyń PB-na 1943 jyly týǵan S.esimdi azamattan anasynyń ata-anasyna qarsy qol kóteretini týraly shaǵym kelip tústi. Ájesi sonymen qatar, janjal kezinde nemeresi olardy úıden qýyp shyǵatyny, tóbeles shyǵaratyny, úıdegi múlikterdi syndyratyndyǵy, ógeı baýyryna túrmege jabamyn dep qorqytatyndyǵy týraly aıtty», - deıdi Naýryzbaı aýdandyq polısıa basqarmasynyń bastyǵy, polısıa podpolkovnıgi Dıdar Ahanov.
Osy jyldyń 2 maýsym kúni 1992 jylǵy S.esimdi azamatshaǵa 1943 jyly týǵan S.esimdi azamatshanyń qaýipsizdigine qatysty buıryq shyǵaryldy. Alaıda ol tanysqany týraly qol qoıýdan bas tartty, osyǵan oraı akt toltyryldy.
Quqyq buzýshy ákimshilik sotqa kelýden birneshe ret bas tartqannan keıin, ony polısıa qyzmetkerleri ákimshilik materıaldy qaraý úshin sotqa májbúrlep jetkizgen.
«Bul materıal 2021 jyldyń 28 shildesinde Almaty qalasynyń MAÁS-da qaraldy jáne eskertý túrinde ákimshilik shara qoldanyldy. Polısıa qyzmetkerleri zalym áıeldiń jaqyn týystaryna qatysty zorlyq-zombylyqtyń aldyn alý úshin bul mekenjaıǵa kún saıyn kelip turatyn bolady», – delingen Almaty qalalyq polısıa departamenti baspasóz qyzmetiniń habarlamasynda.