Sport kúnine oraı Naýryzbaı aýdanynda ulttyq oıyn asyq atýdan jarys uıymdastyryldy
Qazaqstandaǵy Sport kúni tamyz aıynyń úshinshi jeksenbisine sáıkes keledi. Ataýly kúnge oraı Naýryzbaı aýdany ákimdiginiń aýmaǵynda ornalasqan amfıteatr alańynda jergilikti turǵyndar asyq jarysynan baq synady, dep habarlaıdy Almaty-akshamy.kz.
Jarys qala jastary arasynda ulttyq oıyndardy nasıhattaý jáne olardy damytý maqsatynda ótkizildi. Asyq atýdan qalalyq grand-fınaldyń birinshi irikteý kezeńinde bas júlde – Renault Logan avtokóligi tigildi. Baıqaýdyń demeýshisi jáne uıymdastyrýshysy Naýryzbaı aýdany ákimdiginiń qoldaýymen Sirage medıa platformasynyń negizin qalaýshy, bloger, yqpal etýshi Shon Omen boldy.
Shoń Ómenniń aıtýynsha, Almatynyń ár aýdanynda asyq atý ulttyq oıynynan irikteý kezeńderi uıymdastyrylady. Qatysýshylar sany shekteýli, 32 oıynshydan turady. Birinshi bolyp tirkelgender irikteý kezeńine ótedi. Baıqaýǵa qatysýshynyń aty-jóninde tirkelgen jeke kóligi bolmaýy kerek, sonymen qatar utys oıyny týraly jańalyqtardy jiberip almaý maqsatynda @seanomen Instagram paraqshasyna jazylý qajet.
Qajetti sharttar oryndalsa, keri baılanys úshin uıymdastyrýshyǵa tikeleı Instagram jelisinde tolyq aty-jónińizdi, týǵan jylyńyzdy, telefon nómirińizdi kórsetip, hat jazýyńyz kerek.
– Aýdandyq spartakıadada jeńimpazdy iriktep, fınalǵa shyqqan segiz sportshynyń arasynan bas júlde – avtokólikti oınatamyz, – dedi Shoń Ómen. - Fınaldyq utys oıynynyń barlyq qatysýshylary men adal jankúıerler bas demeýshilerimizdiń arnaıy syılyqtaryn alady. Al chempıon óz kóligimen jolǵa shyǵady. Asyq atýdy ne úshin tańdadyq? Bizde ulttyq oıyndarǵa jatpaıtyn basqa jobalar bar. Men qalada óstim. Asfáltta ósken qazaq jigitteri ulttyq salt-dástúrimizdi, oıyndarymyzdy umyta bastaǵanyn kórdim. Bárimiz kóbine oryssha sóılep, salt-dástúrdi umyta bastadyq. Jigitterimiz óz tamyryn umytpasa, jastar ulttyq oıyndar oınasa deımin.
Shoń Ómen ulttyq qundylyqtardy orystildi aýdıtorıaǵa jetkizý úshin qazaq tilin jetik bilse de, áleýmettik jelidegi paraqshasyn orys tilinde júrgizetinin jáne osy maqsatta jeke kóligin júldege tikkenin aıtady.
- Kólik jańa emes, biraq bul bizdiń alǵashqy synaq qadamdarymyz. Bolashaqta demeýshilerdiń arqasynda qala ishinde jańa páterler men kólikterdi degen senimdemin. «#qolda» dep atalatyn jobamyz tek asyq atý ǵana emes, qatysýshynyń kúshin, eptiligin, tapqyrlyǵyn damytatyn sadaq atý, báıge sıaqty qazaqtyń ulttyq dástúrli oıyndarynyń barlyǵyn ótkizýdi josparlap otyrmyz. Jobany aldymen asyq atýdan bastadyq, sebebi uıymdastyrý jaǵynan bul eń ońaı oıyn. Al sharttarǵa sáıkes, bizdiń jarystar jeńildetilgen nusqa bolyp tabylady. Bul joly bizdiń irikteý kezeńinde tek asyq atýǵa arnalǵan jáne biz oıynshylardyń ýaqytyn shektemeımiz. Búgin bizde qatysýshylar arasynda jalǵyz áıel boldy, ol óte jaqsy nátıje kórsetti. Bul engizinen jalpy jaqsy kórsetkish.
Baıqaý aıasynda amfıteatr sahnasynda taǵy bir áserli oqıǵa – Naýryzbaı aýdany «Daryn» bilim berý ortalyǵynyń «Qulager» teatrlandyrylǵan qoıylymymen esep berý konserti, bı jáne mýzykalyq ujymdary óner kórsetti. Munan keıin jarystyń jartylaı fınaly bastaldy. Jeńimpazdar aqtyq synda baq synap, 28 jastaǵy Tóleýbek Kárimbekov jeńimpaz bolyp tanyldy. Ol endi kúzde qalanyń qalǵan jeti aýdanynyń chempıondarymen jeńil kólikti sarapqa salatyn bolady.