Aqtóbe qalasynda Asyq atýdan eresekter arasynda Qazaqstan kýbogy bastaldy.
Ol 1 qarashaǵa deıin jalǵasady, dep habarlaıdy Almaty-akshamy.kz.
Astana, Shymkent, Aqtóbe qalalary men Qostanaı, Pavlodar, Ulytaý, Jambyl, Mańǵystaý, Soltústik Qazaqstan, Batys Qazaqstan oblystarynan jınalǵan 100-den asa sportshy saıysqa túsedi. Erler – Asyq atýdan jaryssa, áıelder Bes asyqtan baq synaıdy.
Dúbirli dodanyń ashylý saltanaty QR Asyq atý federasıasynyń prezıdenti Aslan Sultanov pen QR Asyq atý federasıasynyń atqarýshy dırektory Jomart Sabyrjanovtyń qatysýmen ótti.
«Federasıa ulttyq sportty damytýǵa kúsh salyp keledi. Jeke óz basym jańadan saılanǵan basshy retinde osy isti zerttep-zerdelep, jan-jaqty jumys júrgizýge kirisip kettim. Aldaǵy ýaqytta, ıaǵnı bıylǵy jyldyń sońyna deıin jáne kelesi jyly iske asyratyn naqty jobalarymyz bar. Al búgingi jarysqa qatysatyn barlyq sportshyǵa sáttilik tileımin» - dep málimdedi Asyq atý federasıasynyń prezıdenti Aslan Sultanov týrnırdiń resmı ashylýynda sóılegen sózinde.
Qazaqstan kýbogyndaǵy jeńimpaz komandalar úshin qarjylaı syıaqy qarastyrylǵan.
Sonymen qatar, jeńimpazdar men júldegerler QR Týrızm jáne Sport mınıstrligi Sport jáne dene shynyqtyrý isteri Komıtetiniń kýbogymen, dıplomdarymen jáne medaldarymen marapattalady.
Qosymsha aqparat:
«Asyq atý» respýblıkalyq federasıasynyń prezıdenti - otandyq kásipker Aslan Sultanov. Federasıa jetekshisi bolyp 2023 jyldyń tamyz aıynda saılandy.
QR «Asyq atý» federasıasy QR Ulttyq sport qaýymdastyǵyna múshe. Ulttyq sport qaýymdastyǵynyń quramyna 9, ıaǵnı «Báıge», «Kókpar», «Aýdaryspaq», «Jamby atý», «Dástúrli sadaq atý», «Toǵyzqumalaq», «Asyq atý», «Teńge ilý» jáne «Qusbegilik» federasıalary kiredi.
QR Ulttyq sport qaýymdastyǵynyń prezıdenti – tanymal kásipker, mesenat Islambek Saljanov.