Almaty qalasy máslıhatynyń depýtattary Almaty aglomerasıasyn damytýdyń 2029 jylǵa deıingi keshendi josparyn kelisti, dep habarlaıdy Almaty-akshamy.kz
Almatyda VIII saılanym Almaty qalasy máslıhatynyń kezekten tys IX sesıasy ótti. Kún tártibindegi máselelerdiń biri – Almaty aglomerasıasyn damytýdyń 2029 jylǵa deıingi Keshendi josparyn kelisý.
Keshendi jospar aglomerasıanyń ornyqty áleýmettik-ekonomıkalyq damýyn qamtamasyz etýge baǵyttalǵan. Qujat aýmaqtyq, áleýmettik, jol-kólik, ınjenerlik, ekonomıkalyq, ekologıalyq jáne sıfrlyq damý boıynsha 16 strategıalyq baǵyt aıasyndaǵy jobalardy qamtıdy.
Óz sózinde Almaty ákiminiń orynbasary Asqar Ámrın atap ótkendeı, Keshendi jospar aıasynda qala jáne oblys ákimdikteriniń damýdyń negizgi baǵyttary boıynsha qyzmetin úılestirýdi kózdeıdi.
«Sıfrlyq damý baǵytynda derekter bazasyn ıntegrasıalaý jáne biryńǵaı geoaqparattyq júıeni júrgizý josparlanýda. Bul aglomerasıanyń kartografıalyq jáne qala qurylysy derekterin biriktirýge, qala mańy aýmaqtarynyń nysanaly maqsatyn bekitýge jáne t.b. múmkindik beredi, - dedi alǵy sózinde Asqar Ámrın.
- Almaty qalasynyń kólik qańqasyn tıimdi iske asyrý úshin qajetti Almaty aglomerasıasynyń biryńǵaı kólik modeli ázirlenetin bolady».
Asqar Ámrın «qala men qala mańy aımaǵynda qoǵamdyq kólikti ıntegrasıalaý, BAKAD-qa deıingi 4 radıaldy jáne 7 ishki magıstraldyq kóshelerdi tesý, qala mańyndaǵy temirjol jolaýshylar tasymalyn damytý kózdelgenin» aıtty.
Onyń aıtýynsha, jańa bilim berý jáne densaýlyq saqtaý nysandaryn salý, sondaı-aq qala mańy aımaǵynda jumys oryndaryn qurý esebinen áleýmettik salany damytýǵa biryńǵaı tásil iske asyrylatyn bolady. Sonymen qatar, biryńǵaı jasyl aglomerasıa dálizi jáne taǵy basqalar qurylady.
Esterińizge salsaq, Almaty aglomerasıasyn damytýdyń 2029 jylǵa deıingi Keshendi josparynyń jobasyn Almaty qalasy men Almaty oblysynyń hatshylyqtary «Aglomerasıalardy damytý týraly» Zańnyń 13-babyn iske asyrý sheńberinde ázirlegen bolatyn. Buǵan deıin Keshendi jospardy Almaty aglomerasıasynyń jergilikti keńesi kelisken.