Qazaqtyń erteden kele jatqan jaqsy dástúrleriniń biri osy – Quryltaı shaqyrý.
Mundaı alqaly jıynda ata-babalarymyz eń mańyzdy máselelerin talqyǵa salyp, daýdyń da, jaýdyń da máselesin sheshken. Quryltaıdyń mańyzdylyǵy da osynda. Sol ulyq dástúrdiń qaıtadan jańǵyryp jatqanyn estigende qatty qýandym. Óz basym Memleket basshysy Qasym-Jomart Toqaevtyń ózgeden erekshe bolyp otyrǵany da osy qazaqtyń burynnan kele jatqan bastamalaryn jalǵastyryp otyrǵanynda der edim. Meniń qazaǵym: «keleli isti kóppen shesh, shıelenisti eppen shesh» deıdi. Elimizde ótken eki Quryltaıda da kóptegen jaqsy bastamalar kóterilip, qazir olar jalǵasyn taýyp jatyr. Ulytaýda ótken alǵashqy quryltaıda 25 qazan - respýblıka kúnine qaıtadan memlekettik márte berildi. Bul - barshamyz úshin mańyzdy sheshim. Óıtkeni, sonaý 1990 jyldyń 25 qazanynda Qazaqstannyń egemendigi týraly qabyldanǵan deklarasıa táýelsizdikke bastalǵan alǵashqy qadam edi. Taǵy bir erekshelik, Quryltaıdyń ár aımaqta ótýinde bolyp otyr. Munyń ózi Quryltaı ótken óńirdiń damýyna serpin beredi degen sóz. Alǵashqy jıyn ulylardyń tabanynyń izi qalǵan Ulytaýda ótse, ekinshi Quryltaı barsha túriktiń ordasy bolǵan Túrkistanda ótti. Úshinshi basqosý Jaıyqtyń jaǵasynda Atyraýda bastaldy. Jalpy, ótkizilip jatqan barlyq alqaly jıynnyń aıtary bireý - elimizde beıbitshilik pen turaqtylyq bolýy kerek. Onsyz memlekettiń ósip-órkendeýi múmkin emes. Sondyqtan, el birligi basty maqsat ekeni belgili. Osynaý kúrdeli kezeńde eldiń basyn biriktirip, qıyndyqtyń barlyǵyn yntymaqtyń arqasynda eńsere bereıik!