«Azamattarǵa arnalǵan úkimettegi» tórt aı ishinde 111 baılanys ortalyǵy 9 myńǵa jýyq qońyraý qabyldaǵan.
Onyń 500-ge jýyǵy zorlyq pen qatygezdik jaıynda jáne onyń kóbi balalarǵa qatysty bolǵan, dep habarlaıdy almaty-akshamy.kz.
Azamattardyń eń kóp saýaldary zańgerlik keńes, áleýmettik qorǵaý, bilim berý salasy, densaýlyq saqtaý salasyna qatysty.
111 qyzmeti men jaǵdaıǵa beıjaı qaraı almaıtyn azamattardyń kómegimen sońǵy aılarda birneshe qıyn jaǵdaılar sheshildi: múgedek qyzdyń mekteptegi zorlyq-zombylyqpen kúresýine kómek berildi, er adam quldyqtan qutqaryldy, ákimdiktiń qoldaýymen az qamtylǵan otbasyna órtten keıin turǵyn úıi qalpyna keldi, jalǵyzbasty qart ákeniń ulyn sırkke aparý arqyly armany oryndaldy, sonymen qatar, oqýshy balaǵa kúndelikti mektepke qatynaýy úshin jol júrý kartasyn alýǵa kómek kórsetildi. 111 qyzmetiniń keńesshileri árbir qońyraýdy jeke másele retinde emes, belgili bir otbasynyń birneshe máselelerin sheshý múmkindigi retinde qarastyrady, dep jazylǵan vedomstvo habarlamasynda.
111 qyzmetine jıi júginetin 30 ben 44 jas aralyǵyndaǵy áıelder bolyp tabylady – olardyń qońyraýlary 60% quraıdy. Bul bala quqyǵyn qorǵap, otbasyndaǵy ozbyrlyqqa qarsy kúresetin eń belsendi qoǵamdyq toby.
Baılanys ortalyǵynyń zańgerleri men psıhologtary habarlasqan árbir adamǵa máselesi sheshilgenshe qoldaý kórsetip, keńes beredi, qajet bolǵan jaǵdaıda quqyq qorǵaý organdaryna aqparat beredi.
Otbasy, áıelder jáne balalardyń quqyqtaryn qorǵaýdaǵy 111 qyzmeti 2023 jyldyń 16 qazanynan bastap «Azamattarǵa arnalǵan úkimet» memlekettik korporasıasyna berilgen bolatyn. 111 nómirine táýlik boıy qońyraý shalýǵa bolady, anonımdik jáne jeke derekterdiń qorǵalýyna kepildik beriledi. Baılanys ortalyǵy quqyq qorǵaý organdarymen turaqty baılanysta, barlyq qońyraýlardy tirkep, daǵdarys sheshilgenshe árbir otbasynyń jaǵdaıyn baqylaıdy.