Vıse-premer Serik Jumanǵarın Energetıka mınıstrligine astyqty keptirý úshin óńirlerdi dızel otynymen jáne suıytylǵan gazben qamtamasyz etýdi tapsyrdy, dep habarlaıdy aqshamnews.kz.
Alty oblystyń – Aqmola, Qostanaı, Qaraǵandy, SHQO, SQO jáne Pavlodar fermerleri keptirý agregattary úshin qosymsha 67,7 myń tonna dızel otynyn jáne 21,5 myń tonna suıytylǵan gazdy bólýge 495 ótinim berdi. Aýyl sharýashylyǵy vıse-mınıstri Azat Sultanov atap ótkendeı, óńirlerde barlyǵy 1 301 astyq keptirý agregaty bar, onyń ishinde dızel otynymen 1 043 (80%), suıytylǵan gazben - 258 (20%) jumys isteıdi.
Astyq keptirgishterdiń edáýir sanyna qaramastan, soltústik aımaqtarda taǵy 76 qondyrǵyǵa qajettilik bar. Jedelshtabta aýyl sharýashylyǵy ónimderi úshin keptirgishterdi satyp alýǵa shyǵyndardyń 30% - na deıin óteý boıynsha ınvestısıalyq sýbsıdıalaý kózdelgenin atap ótti.
Óz tarapynan “QazAgroQarjy" fermerlerge keptirý agregatorlaryn lızıńke berý úshin qajetti is-sharalar ótkizdi. Biraq olarǵa áli ótinishter túsken joq.
Dándi daqyldardyń negizgi jınalýy kúzge deıin sozylatyndyǵyn eskere otyryp, ýaqtyly ótinish bergen kezde keptirý qondyrǵylary egin jınaý naýqanynyń ortasynda tapsyrys berýshilerge kele alady.
Kólik mınıstrligi astyqty eksportqa jáne el ishinde tasymaldaý boıynsha jedel shtab qurý týraly habarlady. Memlekettik organdardan, ákimdikterden jáne QTJ-dan basqa, jedelshtabqa qatysýshylar qataryna Azyq-túlik korporasıasy men "Atameken" UKP kiredi. Búgingi kúni jetkizilim jaǵynan máseleler bolǵan joq.
Otyrysta sondaı-aq Saýda jáne ıntegrasıa mınıstrligi tarapynan aýyl sharýashylyǵy ónimderin eksporttaý jónindegi Jol kartasynyń jobasy ázirlengeni aıtyldy. Qujat jobasy "Atameken" UKP jáne salalyq qaýymdastyqtarmen kelisildi.
- Jedel shtabta biz barlyq týyndaıtyn jedel máseleler boıynsha jınaqtap, olardyń problemaǵa aınalmaýy úshin sheshim tabýymyz kerek,-dep qorytyndylady vıse-premer. - Bizdiń búgingi mindetimiz - egin jınaý úshin barlyq qajettimen fermerlerdi qamtamasyz etý. Sonymen qatar eksport máselelerin sheshý.