Almatyda aty ańyzǵa aınalǵan A’Studio tobynyń ánderi jelisimen túsirilgen «Toqta, tún!» kınomúzıklynyń (rejısery Farhat Sharıpov) tanystyrylymy ótti. Onyń alǵashqy kórermenderi BAQ ókilderi boldy.
...Beıbit esimdi jas mýzykant tabysty artıs bolý armandaıdy. Eńbekqor jigit óziniń «Dıgıdaı» tobymen birge sahnany sátti baǵyndyryp, tıimdi kelisimsharttarǵa qol jetkize bastaıdy. Júregi mahabbatqa, qýanyshqa, ambısıaǵa toly jigit súıgen qyzy Almamen bas qurap, ómirge sábı kelip, baqytty sátteri eselene túsedi. Ómir jolynda Djýlıa esimdi ádemi bıshi qyz paıda bolǵanǵa deıin onyń kúnderi osylaı órilip jatqan-dy.
Alma jórgektegi balamen úıde, kúıki tirliktiń aýzyna jutylyp kete barady, al qyzyldy-jasyldy álemge, áýenge qumar sezimtal jigit qyzyqty syrttan izdep, ózin unatyp qalǵan Djýlıaǵa kóńil burady. Shańyraǵyna tań ata oralýdy, tipti keıde kelmeı qalýdy shyǵarady.
Kúnderdiń kúninde Beıbittiń janynda jary da, dostary da qalmaıdy. Iá, mahabbat, dostyq, adaldyq, ata-anaǵa, aınalaǵa qurmet syndy qundylyqtar kınoda óner tilimen, mýzyka áýenderimen myń qubyla sýretteledi.
***
«Toqta, tún!» fılmi jaqyn jandar arasyndaǵy osyndaı kúrdeli qarym-qatynastardan bólek, arý Almatyǵa degen súıispenshilikti, onyń jaryq ta keń kósheleriniń ádemiligin de bere bilgen. Kartına sonysymen qundy shyqqan sekildi.
«Toqta, tún!» A’Studio tobynyń ánderi jelisimen túsirilgenimen, sújeti mýzykalyq toppen múldem baılanysty emes. Aıtpaqshy, bıyl «Toqta, tún!» ániniń jaryqqa shyqqanyna 30 jyl tolady. Búgingi kınomúzıklge paıdalanylǵan bul saýndtrek alǵash ret 1994 jyly oryndalǵan. Aldaǵy ýaqytta ataýly kúndi erekshe atap ótý de josparlanyp otyrǵan sekildi.
***
Kemeńger Oral (kınoda Beıbit), Qarlyǵash Ermekova (Alma), Jasmın Nurahmet (Djýlıa) syndy jas akterlar oınaǵan kórsetilim bitken soń, jýrnalıserge arnalyp baspasóz máslıhaty da uıymdastyryldy. Onda jas akterlarmen birge, kınomúzıkldyń prodúserleri Baıǵalı Serkebaev pen Dına Jumabek te bolyp, BAQ ókilderiniń saýaldaryna jaýap berdi. Olar kınokartınada negizgi oqıǵalardy beıneleýge A’Studio tobynyń 17 áni usynylǵanyn atap ótti. Múzıklde tyńdarmandardyń súıikti hıtterine aınalǵan «Stop, noch!», «Soldat lúbvı», «Greshnaıa strast, «Tık-tak», «Eshe lúblú» jáne «Djýlıa» sıaqty basqa da ánder oryndalady. Kórermenge tosynsyı retinde toptyń sonaý «Almaty» atalǵan kezdegi alǵashqy álbomyndaǵy qazaqsha ánderi de shyrqalady. Fılm múzıkl janrynda bolǵandyqtan, ol dınamıka men energıa beretin eń jarqyn mýzykalyq qoıylymdarǵa toly boldy, sondaı-aq oǵan ártúrli stıldegi 500-den astam bıshi qatysqan.
***
Prodúserler basty keıipkerdi kim oınaıtynyn uzaq ýaqyt boıy sheshe almaǵandaryn da atap ótti. Kemenger Oral bul rólge bekitilgenge deıin kóp kúsh jumsaǵan. Ol vokalmen aınalysyp, dıksıasyn retteý úshin arnaıy sabaq alýǵa májbúr bolǵan. Prodúser Dına Jumabek Kemeńgerdi talantyna, eńbekqorlyǵyna, jankeshtiligine kóz jetkizip baryp tańdaǵandaryn aıtty.
Beıbit róline arnalǵan vokaldyq partıalardy kartınada ánshi Mádı Syzdyqov oryndaǵan, biraq keıbir ánderdi bas keıipker Kemengerdiń ózi de shyrqaıdy. Tipti ekeýiniń daýysynda uqsastyq bolǵan eken.
«Men buryn mundaı múzıkl janrynda oınaǵan emespin. Qalaı shyǵar eken dep qatty ýaıymdadym. Biraq osy janrda baǵymdy synaýdy stýdent shaǵymnan armandaýshy edim. Vokaldan basqa, horeografıalyq nómirlerde de kóp jumys isteýime týra keldi. Tóreligin kórermender bere jatar», – dedi basty keıipkerdi somdaǵan Kemeńger Oral.
Iá, endigi sózdi kınosúıer kórermenderge qaldyramyz.