QR Premer-Mınıstriniń birinshi orynbasary Roman Sklárdyń tóraǵalyǵymen ınvestısıalar tartý jónindegi keńestiń kezekti otyrysynda Astana qalasynyń ınvestısıalyq baǵdarlamasy bekitildi. Baǵdarlama aıasynda qajetti túıindi salalar men jobalar usynyldy, dep habarlaıdy aqshamnews.kz
Bul baǵdarlama ınvestısıalarǵa «tapsyrys» modeline kóshýdi kózdeıtin óńirlerdiń ınvestısıalyq baǵdarlamasynyń 17 mamyrda maquldanǵan tetiginiń logıkalyq jalǵasy boldy. Astana osy modeldi engizý úshin pılottyq aımaq bolyp tańdaldy.
Energetıka sektoryna ınvestısıalar tartý kún tártibindegi jeke másele retinde qarastyryldy. Energetıka salasyna tartylatyn ınvestısıalar aımaqtyń energetıkalyq qaýipsizdigin arttyrýǵa jáne ınfraqurylymyn jaqsartýǵa baǵyttalǵan.
Astananyń ınvestısıalyq baǵdarlamasy qala ekonomıkasynyń damýyna jańa serpin berip, óńirlerdiń áleýmettik-ekonomıkalyq damýyna úles qosatyn mańyzdy jobalardy qamtıdy. Bul baǵdarlamanyń júzege asyrylýy Astanany ınvestısıalar úshin tartymdy ári básekege qabiletti aımaqqa aınaldyrýǵa múmkindik beredi.