Áleýmettik jelilerde reısterdiń toqtatylýyna jáne keshiktirilýine baılanysty óz josparlaryn ózgertken jolaýshylar bıletteriniń qunyn qaıtarý barysynda ádiletsizdiktiń oryn alǵany týraly qate aqpar jarıalanyp jatyr, dep habarlaıdy Almaty-akshamy.kz.
Bul týraly QR Kólik mınıstrliginiń Feısbýktegi paraqshasynda habarlanǵan.
«Atalǵan másele birden ári tolyǵymen jolaýshylar úshin ońtaıly sheshilgen. Qazaqstannyń kólik mınıstrligi avıakompanıalarǵa aýa raıyna baılanysty Astanadan ushyp kete almaǵan jolaýshylarǵa bıletter qunyn 100% qaıtarýdy tapsyrdy. Bıletti arnaıy qosymshalar arqyly qaıtarý kezinde belgili bir soma ustalyp qalady dep shyǵýy múmkin. Óıtkeni áýe kompanıalardyń bılet satýǵa arnalǵan júıeleriniń tehnıkalyq baptaýlary avtomatty túrde solaı esepteıdi. Sondyqtan bılettiń tolyq qunyn qaıtarý úshin jolaýshylar avıakompanıalarǵa tikeleı júginýi kerek. Muny eki ádispen júzege asyrýǵa bolady: telefondaryna habarlasyp nemese Astana áýejaıy ǵımaratynda ornalasqan áýe tasymaldaýshylardyń keńselerine baryp, bılettiń tolyq qunyn qaıtaryp alýǵa bolady», delingen habarlamada.
Baspasóz hatshysy bılettiń aqshasyn qaıtarý kezinde belgili bir soma ustalyp qalýy múmkin ekenin eskere otyryp, bılettiń tolyq qunyn qaıtarý úshin jolaýshylar arnaıy qosymshalar ne saıt arqyly emes, avıakompanıalarǵa tikeleı júginýi kerek ekenin eskertti.
Aıta keterligi, kesheden beri Kólik mınıstrliginiń ókilderi Astana áýejaıynda júr. Mınıstr óz reısterin kútip otyrǵan jolaýshylarmen sóılesip, aýa raıynyń qolaısyzdyǵynan avıakólikke qatysty qalyptasqan jaǵdaıdy retteý úshin jedel shtab qurý boıynsha tapsyrma bergen bolatyn.
Keshe áýe kompanıalarymen keńes ótkizilip, jolaýshylardy jóneltýge jáne ushý kestesin ońtaılandyrýǵa qatysty birqatar sheshim qabyldandy. Nátıjesinde jaǵdaı ońtaıly sheshilip, áýejaı túnnen bastap kelgen ushaqtardy qabyldap, qazirgi tańda qalypty rejımde ushýdy qamtamasyz etýde.