Qazaqstan Gınnes rekordyn ornatýdy josparlap otyr. Tanymal prodússer Dáýit Shaıhıslamov túrli ult ókilderinen turatyn eń úlken orkestr qurmaq, dep habarlaıdy Almaty-akshamy.kz Inform.kz-ke silteme jasap.
«Buǵan deıingi «Álem kartınasy» jobasy meni shabyttandyrdy desem de bolady. Materıaldyq emes rýhanı jaǵyn aıtyp turmyn. Meıirimdiliktiń mol energıasyn alǵan kezde sol energıany ózgelermen de bóliskiń kelip turady. Jańa joba ıdeıasy birazdan beri pisip jetilgen edi. Degenmen, onyń bastalýyna qyrkúıek aıynyń ortasynda Qazaqstan elordasynda Álemdik jáne dástúrli dinder kóshbasshylarynyń VII sezi ótetindigi týraly habar túrtki boldy. Osynaý jahandyq oqıǵaǵa Rım Papasynyń keletindigi de josparlanǵan. Qazaqstannyń bas qalasyna ǵalamshardyń barlyq túkpirinen túrli konfesssıa ókilderi kelgen kezde olardy kópultty orkestrdiń qarsy alýynyń sımvoldyq máni bar», - dedi Dáýit Shaıhıslamov.
Onyń aıtýynsha, «Álem mýzykasy» dep atalatyn joba aıasynda bir sahnada túrli halyq pen ulttyq eń kóp ókili bas qosyp, mýzykalyq shyǵarma oryndaıdy. Osylaısha, eń kópultty orkestr retinde Gınnestiń rekordtar kitabyna ený kózdelgen. Qazirgi ýaqytta mýzykanttar worldrecord.kz jobasynyń resmı paraqshasyna ótinim qaldyryp jatyr.
Dáýit Shaıhıslamovtyń sózine qaraǵanda, mýzykanttardyń qandaı shyǵarma oryndaıtynyna qatysty aldyn ala ýaǵdalastyq bar. İs-shara 6 qyrkúıekte Beıbitshilik pen kelisim saraıynda ótetin bolady.
«Ázirshe qansha adam qatysatyndyǵyn aıtpaımyn. Óıtkeni, rekordtyń áseri bolmaı qalady. Iaǵnı, sońyna deıin, Gınnes rekordtar kitaby ókili qatysýshylardyń naqty sanyn aıtqansha qupıa ustaımyz», - dedi ol.