Áskerı-qoldanbaly jáne oıyn sport túrlerinen Qarýly kúshterdiń XX Spartakıadasy sheńberinde voleıboldan Qarýly kúshterdiń chempıonaty qorytyndylandy.
Jarys Keńes Odaǵynyń Batyry, Halyq Qaharmany, armıa generaly Saǵadat Nurmaǵambetov atyndaǵy elordalyq áskerı kolejde ótti. Aqtyq oıyn Astana qalasyndaǵy Jaqsylyq Úshkempirov atyndaǵy Jekpe-jek saraıynda ótti, dep habarlaıdy Almaty-akshamy.kz.
Vedomstvo aqparatyna súıensek, tartysty jarysqa 14 komanda quramynda 150-den astam áskerı qyzmetshi qatysty.
Voleıbolshylardy chempıonattyń aıaqtalýymen Qorǵanys mınıstrliginiń Sport komıtetiniń tóraǵasy – OSK bastyǵy podpolkovnık Arman Ábeýov quttyqtady.
– Voleıbolda, áskerdegideı, komandalyq rýhqa, úılesimdilikke jáne nátıjege nazar aýdarý asa mańyzdy. Jarysqa qatysýshylar jankúıerlerdi tamasha tehnıka men joǵary sporttyq sheberlikterin kórsete otyryp, qyzyq sáttermen qýantty, – dedi ol.
Jarys qorytyndysy boıynsha Áýe qorǵanysy kúshteriniń voleıbol komandasy úzdik dep tanyldy. Ekinshi oryndy «Shyǵys» óńirlik qolbasshylyǵynyń quramasy, úshinshi oryn – «Ońtústik» ÓńQ buıyrdy.
Jarysty uıymdastyrýshylar bes nomınasıa boıynsha úzdikterdi marapattady. Atap aıtqanda, «Úzdik shabýyldaýshy» jáne «Úzdik baılanystyrýshy» merzimdi qyzmettegi sarbazdar Dosymjan Ábilash pen Adal Bekmurzaev (Desanttyq-shabýyldaý áskerleri), «Úzdik oıynshy» – 3-synypty serjant Marat Ibraımov («Shyǵys» ÓńQ), «Úzdik qorǵaýshy» – podpolkovnık Rıshat Zulpyqarov (Áýe qorǵanysy kúshteri),«Úzdik lıbero oıynshy» – leıtenant Jasýr Babaqanov (ÁSHQQ áskerleri).
Chempıonattyń jeńimpazdary men júldegerleri komandalyq kýboktarmen, medaldarmen jáne gramotalarmen marapattaldy.