Beıbitshilik jáne kelisim saraıynda Otan qorǵaýshy kúni men Uly Jeńistiń 80 jyldyǵyna arnalǵan konsert ótti.
İs-sharaǵa tyl eńbekkerleri, Qarýly kúshterdiń, basqa da áskerler men áskerı quramalardyń ardagerleri men áskerı qyzmetshileri, sondaı-aq Premer-mınıstr Oljas Bektenov, Memlekettik Keńesshi Erlan Qarın, qorǵanys mınıstri general-polkovnık Rýslan Jaqsylyqov qatysty.
Belgili qazaqstandyq mádenıet qaıratkerleri, jetekshi ártister, orkestrlik, hor jáne bı ujymdary áskerı qyzmetshilerge, Qarýly kúshterdiń ardagerlerine, áskerı kolej ben «Jas sarbaz» áskerı-patrıottyq qozǵalysynyń tárbıelenýshilerine arnap patorıottyq kompozısıalar men soǵys jyldaryndaǵy ánderdi oryndady.
Estradalyq-sımfonıalyq orkestr men fólklorlyq-etnografıalyq ansámbldiń oryndaýynda Nurǵısa Tilendıevtiń «Ata tolǵaýy» kúıi oryndaldy. Birikken shyǵarmashylyq ujym uly dala áýenderi men orkestrlik mýzykanyń kúshin biriktire otyryp, uly kompozıtordyń dúnıetanymyn sheber jetkize bildi.
Jońǵar shapqynshylyǵynyń aýyr kezeńindegi qazaq halqynyń basyna tóngen qaýip-qater, azap-qıynshylyqty, boskan eldiń muń-zaryn tolǵaıtyn tarıhı sazdy «Elim-aı» oryndaldy.
«Soǵys hattary» mızansenasynda Álıa esimdi boıjetken Keńes Odaǵynyń Batyry Álıa Moldaǵulovaǵa úndeý joldaý arqyly taqyryptyń ıdeıalyq mazmunyn beıneli túrde kórsete bildi. Kóńil tolqytarlyq kórinis «Álıa» ániniń oryndalýymen aıaqtaldy.
«Jas qazaq», Jýravlı», «Talánochka», «Trı tankısta», «Iablochko», «Eh, dorogı», «Sınıı platochek», «Katúsha», «Ehal ıa ız Berlına» jáne «Maıskıı váls» ánderin kórermen jyly qabyldady.
Solıser men vokaldyq toptardyń, sondaı-aq, hor ujymdarynyń oryndaýynda áskerı-patrıottyq taqyryptaǵy «Qarýly kúshter», «Ǵasyrlar úni», «Umytpaımyz», «Men qazaq», «Qazaqstan – baıtaq dala», «Saýyt» jáne «Atameken» ánderi shyrqaldy.
Konsertti K. Baıseıitova atyndaǵy Qazaq ulttyq óner ýnıversıtetiniń dombyrashylary men solıseri «Jeńis kúni» jáne «Atameken» ánderimen qorytyndylady.