Búginde Qazaqstannyń barlyq óńirlerinde asqazan-ishek joldarynyń onkologıalyq aýrýlaryn erte dıagnostıkalaýǵa arnalǵan mamandandyrylǵan saraptamalyq endoskopıalyq ortalyqtar ashyldy. Bul týraly QR Densaýlyq saqtaý vıse-mınıstri Erjan Nurlybaev Astanada ótken II Ortalyq Azıa endoskopıalyq forýmynda aıtty.
«Eń bastysy – naq osy ortalyqtarda klınıkalyq tájirıbe jınaqtalyp, az ınvazıvti dıagnostıka men emdeý ádisteriniń damýy úshin kúsh-jigerdi shoǵyrlandyrý jáne joǵary bilikti mamandardy tartý bolyp tabylady. Qazirgi tańda mundaı endoskopıalyq ortalyqtar elimizdiń barlyq derlik óńirlerinde jumys isteıdi, – dep atap ótti Erjan Nurlybaev.
II Ortalyq Azıa endoskopıalyq forýmy Qazaq endoskopıalyq qoǵamy men Ulttyq ǵylymı onkologıa ortalyǵynyń uıymdastyrýymen, QR Densaýlyq saqtaý mınıstrliginiń qoldaýymen ótti, bul sharaǵa Qazaqstan, Reseı, Belarýs, Ýkraına, Mońǵolıa, Úndistan jáne basqa elderden 400-ge jýyq qatysýshy men 40 shaqty spıker jınaldy.
Eki kún boıy sarapshylar dıagnostıka men emdeýdiń zamanaýı tásilderin talqylap, endoskopıalyq aralasýlar kórsetip, onkologıa, gastroenterologıa, pýlmonologıa jáne ózge de salalardaǵy úzdik tájirıbelerimen bólisti.
Qonaqtardyń qatarynda álemdik deńgeıdegi jetekshi mamandar: Japonıadan óńeshtiń zamanaýı endoskopıalyq hırýrgıasynyń negizin qalaýshylardyń biri profesor Harýhıro Inoe; asqazan obyryn erte anyqtaý salasyndaǵy sarapshy profesor Tomohıko Morıama; sondaı-aq Ońtústik Koreıadan profesor Chon Son Ý jáne basqalar boldy.
Forýmnyń jumysy kezinde jasandy ıntellekt júıeleri men erte kezeńdegi obyrdy dıagnostıkalaýǵa jáne az ınvazıvti aralasýlarǵa arnalǵan qural-jabdyqtar kórmesi ótti.
Qazaq endoskopıalyq qoǵamynyń tóraǵasy, Ulttyq ǵylymı onkologıa ortalyǵynyń saraptamalyq endoskopıa bólimshesiniń meńgerýshisi Qanat Batyrbekov qazirgi tańda negizgi nazar ashyq hırýrgıalyq aralasýsyz-aq qatersiz, shekaralyq jáne erte satydaǵy qaterli isikterdi alyp tastaýǵa múmkindik beretin joǵary tehnologıalyq operasıalarǵa aýdarylǵanyn aıtty:
«Onkologıada endoskopıanyń orny erekshe. Ol isikti erte anyqtap qana qoımaı, ony jumsaq tásilmen alyp tastaýǵa múmkindik beredi. Biz qazirgi endoskopıanyń dıagnostıkadan bastap, jýyrda múmkin emes dep sanalatyn az ınvazıvti emdeýge deıingi barlyq áleýetin kórsetýge umtylamyz, – dedi ol.
Forýmnyń sheńberinde sımýlásıalyq stansıalarda trenıńter uıymdastyrylyp, qatysýshylar naqty ýaqytta POEM, ESD, ERCP sıaqty kúrdeli aralasýlardy operasıalyq zaldardan live-sessıalar kezinde baqylady.