7 sáýir men 1 mamyr aralyǵynda Astanadaǵy St Regis qonaq úıiniń kıiz úıinde shahmattan álem chempıony ataǵy úshin mach ótedi, dep habarlaıdy almaty-akshamy.kz
Esterińizge sala keteıik, 2022 jyldyń 31 qazanynda shahmattan qazirgi 16-álem chempıony Magnýs Karlsen klasıkalyq shahmattan álem chempıony ataǵyn qorǵaýdan bas tartty, osyǵan baılanysty 2022 jylǵy týrnırdiń jeńimpazdyǵyna úmitker Ian Nepomnáshııdiń qarsylasy týrnırde ekinshi oryn alǵan Dın Lıjen boldy. Bul sportshylar halyqaralyq shahmat federasıasynyń (FIDE) álemdik reıtıńinde ekinshi jáne úshinshi oryndardy ıelenedi: Ian Nepomnáshııdiń reıtıńi 2793, Dın Lıjenniń reıtıńi 2788. Qandaı nátıje bolsa da bul mach 17-jańa shahmat tájiniń ıegerin anyqtaıdy.
Astanada ótetin álem chempıonaty alǵashqy 40 aınalymǵa 120 mınýt, kelesi 20 aınalymǵa 60 mınýt jáne 61- aınalymǵa 30 sekýnd qosyp qalǵan aınalymdarǵa 15 mınýt ýaqyt baqylaýymen 14 partıadan turady. Teń esep bolǵan jaǵdaıda, qarsylastar rapıdtan pleı-off oınaıdy.
2 mıllıon eýro júlde qoryn tolyq qamtamasyz etetin týrnırdiń bas seriktesi jáne uıymdastyrýshysy – Freedom Holding Corp.
Álem chempıonatyna FIDE prezıdenti Arkadıı Dvorkovıch, shahmattan 14-álem chempıony Vladımır Kramnık, shahmattan 15-álem chempıony Vıshı Anand, áıelder arasyndaǵy shahmattan 4 dúrkin álem chempıony Hoý Ifan, sondaı-aq grosmeısterler – Danııl Dýbov, Vıorel Bologan, áıelder grosmeısteri, Latvıanyń burynǵy ekonomıka mınıstri jáne qarjy mınıstri Dana Reıznıse-Ozola sıaqty birqatar ataqty qonaqtar keledi dep kútilip otyr.
Chempıonat aıasynda qonaqtar bir mezgilde birqatar semınarlar men oıyn seanstaryn ótkizedi. 2023 jylǵy álem chempıonatyn ótkizý barysynda Qazaqstan Respýblıkasy men álemniń áıelder qurama komandalary (rapıd jáne blıs) arasynda halyqaralyq mach ótedi, sondaı-aq 14 jasqa deıingi uldar men qyzdar arasynda Future World Champions 2023 I kezeńi ótedi. Bul kezeń 2023 jylǵy Qazaqstan Respýblıkasy balalar Kýbogynyń fınalyna qatysatyn úmitkerlerdi anyqtaıdy.
"Aldaǵy álem chempıonaty shahmat álemi úshin de, Qazaqstan úshin de mańyzdy oqıǵa bolyp sanalady. Qazirgi ýaqytta elimizdegi shahmat trendte. Biz shynymen de qyzyǵýshylyqtyń artyp kele jatqanyn baıqaımyz. Osyǵan baılanysty Qazaqstan jas urpaq úshin shahmatty damytýdyń baǵdarlamasyn qabyldady. Qazir Federasıa aldynda shahmatty túbegeıli jańa deńgeıge kóterý, jas shahmatshylarǵa keremet múmkindikter jasaý jáne jańa talanttardyń irgetasyn qalaý mindeti tur. Machty ótkizý – Qazaqstannyń álemdik sporttaǵy mańyzdylyǵynyń jáne bizdiń zor áleýetimizge degen senimniń dáleli. Aldaǵy jyldary bizdiń sportshylar jańa jetistikterge jetetinine senimdimin jáne biz qazaqstandyqtardyń jeńisimen maqtanamyz", – dep atap ótti Qazaqstan Shahmat federasıasynyń prezıdenti Tımýr Týrlov.