QR Mádenıet jáne aqparat mınıstrliginiń qoldaýymen QR Ulttyq mýzeıinde «Ýaqyt qushaǵynda» atty aýǵan qazaqtarynyń kilem kórmesiniń saltanatty ashylý rásimi ótti, dep habarlaıdy almaty-akshamy.kz QR Mádenıet jáne aqparat mınıstrliginiń baspasóz qyzmetine silteme jasap.
Kórermen nazaryna kilem óndirisinde aldyńǵy qatarly qolóner buıymdaryn daıyndaıtyn «Nasim Nayman Qazaq Karpet» kompanıasynyń kilemderi usynylǵan. Kompanıa basshysy – Násım Naıman kishkentaıynan kilem toqý isimen aınalysyp, Aýǵanstanda kilemdi qolmen toqý ónerkásibiniń damýyna septigin tıgizdi.
«Halqymyzdyń qolónerin damytýǵa baǵyttalǵan sharalar úshin Ulttyq mýzeıdiń esigi árqashanda ashyq ekenin aıtyp ótkim keledi. Onyń bir mysaly retinde bıylǵy jyly Ulttyq mýzeıde ashylǵan «Qolónershiler ortalyǵyn» atap ótýge bolady. Búgingi oryn alyp otyrǵan kórme de osynyń dáleli. Bul kórmeniń ereksheligi – sonaý Aýǵanstan jerindegi ózimizdiń baýyrlarymyz toqyǵan kilemderdiń halyq nazaryna usynylýy. Olar osy ónerdi keremet damytyp qana qoımaı, ony álemdik deńgeıde nasıhattap júrgenine kóz jetkizdik», - dedi QR Ulttyq mýzeıiniń ǵylymı hatshysy Saıalbek Ǵızatov.
Kórmege 2023 jyly toqylǵan jáne túrli kompozısıalyq sújetterdi usynatyn 60-qa jýyq kilem qoıyldy.