Qazaqstan Premer-mınıstri Oljas Bektenov elordada jeńil relsti kólik (LRT) jelisin salý jobasynyń barysyn tekserdi, dep habarlaıdy aqshamnews.kz
Astana qalasynyń ákimi Jeńis Qasymbek nysannyń daıyndyq deńgeıi men megapolıstiń kólik júıesin odan ári damytý bolashaǵy týraly baıandady.
Búgingi tańda LRT estakadasynyń arqalyqtaryn tóseý kezeńi aıaqtaldy. Stansalardyń negizgi temirbeton konstrýksıalaryn salý 2024 jyldyń sońyna deıin aıaqtalady dep josparlanyp otyr. Kelesi jyly relsterdi tóseý, stansalardy árleý, jyljymaly quramdardy jetkizetin depo qurylysyn júrgizý, sondaı-aq Qabanbaı batyr dańǵyly men Qaldaıaqov kóshesindegi estakadalyq bólikti abattandyrý jumystary júrgiziledi.
Jeńil relsti jeliniń jalpy uzyndyǵy 22,4 km quraıdy. LRT quramyna 18 stansa kiredi. Jospar boıynsha, 652 adam syıatyn 19 jyljymaly quram iske qosylady. Qozǵalys aralyǵy 4-5 mınýtty quraıdy. Alǵashqy kezeńde táýligine 25 myń adam jolaýshylar aǵyny kútilse, eń joǵary ýaqytta táýligine 92 myń adamǵa deıin jetýi múmkin. Tólem júıesi qalalyq analogy boıynsha, kólik kartasyn valıdasıalaý nemese QR-kod arqyly tóleý arqyly júzege asyrylady.
Premer-mınıstr stansalar aýmaǵynda qurylys barysynda qoldanylatyn tehnologıalyq sheshimdermen tanysty.
Jobany iske asyrýǵa joǵary standarttarymen tanymal qytaılyq jetekshi kompanıalar, atap aıtqanda China Construction Sixth Bureau, Yunnan Construction and Investment Holding Group Co., Longjian Road and Bridge Co., Tianjin Rail Transit Group Co., CRRC Tangshan Co LTD. tartylǵan. Sondaı-aq CRSC International, CASCO jáne HUAWEI Smart Transport BU kompanıalary kólik júıesiniń qaýipsiz ári tıimdi jumysyn qamtamasyz etýde mańyzdy ról atqaryp otyr.
China Railway Asia-Europe Construction Investment qosalqy merdiger kompanıasynyń bas dırektory Chjoý Haıveı ınovasıalyq tehnologıalardyń qoldanylyp jatqanyn baıandady. Joba aıaqtalǵannan keıin jeńil relsti jeli boıymen júrgizýshisiz poıyzdar iske qosylady.
«City Transportation Systems» JSHS basqarma tóraǵasy Asylbek Dúısebaevtyń aıtýynsha, barlyq qurylys jumystaryn aıaqtaý jáne LRT-ny iske qosý 2025 jyldyń sońyna deıin josparlanǵan.
Oljas Bektenov jobanyń sapasy men iske asyrylý merzimderin baqylaýdy kúsheıtý qajettigin atap ótti.
«Memleket basshysy elimizdiń kólik júıesin damytýǵa úlken kóńil bólýde. LRT jobasy boıynsha ınfraqurylymdy daıyndaý úshin aýqymdy jumys atqaryldy, qarajat bólindi. LRT qala turǵyndary men elorda qonaqtaryna qyzmet etedi. Qurylys qarqyny artyp keledi, ony báseńdetpeý mańyzdy. Joba eń joǵary deńgeıde júzege asyrylýy tıis. Ákimdik pen ortalyq memlekettik organdar tarapynan baqylaý kúsheıtilýi qajet. Biz nátıjege baǵyttalamyz», — dedi Premer-mınıstr.