Almaty qalasy Óńirlik komýnıkasıalar qyzmetinde ótken brıfıńte Polısıa departamentiniń resmı ókili Saltanat Ázirbek jol-kólik oqıǵalarynyń statısıkasyn jarıalap, joldardaǵy qaýipsizdikti arttyrýǵa baǵyttalǵan sharalar týraly aıtty, dep habarlaıdy aqshamnews.kz
Spıkerdiń málimetinshe, 2024 jyldyń basynan beri Almatyda 3 869 jol-kólik oqıǵasy (JKO) tirkelip, sonyń saldarynan 4 211 adam zardap shekken. Apattardyń basty sebebi qalanyń kólik qozǵalysynyń qarqyndylyǵy: búgingi kúni Almatyda 650 889 avtomobıl tirkelgen, al megapolıske kún saıyn óńirlerden 550 000-ǵa deıin kólik kiredi.
Mopedter men elektr skýterler sıaqty balamaly kólik túrleriniń qatysýymen JKO sanynyń artýy alańdatarlyq jaıt.
Polısıa málimetinshe:
- Mopedterdiń qatysýymen 743 JKO oryn alyp, 757 adam jaraqattanyp, 14 adam qaza tapty.
- Elektr skýterleriniń qatysýymen 103 JKO tirkelip, 109 adam jaraqat alǵan. Qaza tapqandar joq.
- Motosıklderdiń qatysýymen 19 apat tirkelip, 19 adam jaraqattanyp, 2 adam qaza bolǵan.
Saltanat Ázirbek mopedshiler men skýterlerdi baqylaýdy kúsheıtý úshin kúndelikti reıd júrgizetin 8 motosıkl ekıpajynyń patrúldik qyzmet atqaratynyn atap ótti. Jyl basynan beri 31 894 moped júrgizýshisi jáne 28 762 skýter paıdalanýshysy ákimshilik jaýapkershilikke tartylǵan. Sonymen qatar, kámeletke tolmaǵandardy moped pen skýter júrgizýge ruqsat etkeni úshin 113 ata-anaǵa qatysty sharalar qabyldanǵan.
"Jyl basynan beri Almatyda 3 420 483 jol qozǵalysy erejesi buzylǵan. Mas kúıinde kólik basqarǵany úshin 1 890 júrgizýshi ustaldy, 2 846 adam júrgizýshi kýáliginen aıyryldy, al 6 000-nan astam kólik, onyń ishinde 1 700 moped arnaıy turaqqa qoıyldy", — dep qorytyndylady Almaty PD ókili.
Esterińizge sala keteıik, 3 qazanda Prezıdent Qasym-Jomart Toqaev moped ıelerin júrgizýshi kýáligin alýǵa jáne kólikterin tirkeýge mindetteıtin zańǵa qol qoıǵan bolatyn. Bul sharalar jol qaýipsizdigin arttyrýǵa jáne mopedterdiń qatysýymen bolatyn JKO sanyn azaıtýǵa baǵyttalǵan.
Mopedterdi tirkeý úshin kelesi qujattardy usyný qajet:
- Jeke kýálik (nemese sıfrlyq qujattar servısi arqyly elektrondyq túrde);
- Salyq kodeksiniń 553 jáne 615-baptaryna sáıkes tirkeý alymy men memlekettik baj tólengenin rastaıtyn qujattar;
- Mopedtiń tehnıkalyq qujaty nemese ashyq kózderden alynǵan tehnıkalyq sıpattamalary týraly aqparat;
- Menshik ıesiniń ótinishi;
- Kólik quralyn tekserý aktisi.
Eger moped ramasynyń nómiri bolmasa, sáıkestendirý nómirin tirkeýge deıin ýákiletti organ moped ıesiniń ótinishi boıynsha beredi.