Elordalyq «Astana Opera» teatrynyń qorjyny taǵy bir bedeldi marapatpen tolyqty.
Teatr rejıseri Erenbaq Toıkenov Máskeýde ótken halyqaralyq «Nano-Opera» baıqaýynda júldeli ekinshi orynǵa ıe boldy. Beldi saıysta jas maman qazylarǵa kásibı daıyndyqtyń joǵary deńgeıin jáne shyńdalǵan sheberligin ǵana emes, sondaı-aq otandyq operanyń rejıssýra salasynda básekege qabiletti ekenin de sheber kórsetti, dep habarlaıdy Almaty-akshamy.kz Qazaqtv.com saıtyna silteme jasap.
Qazaqstandyq qatysýshynyń talanty basqa nomınasıalarda da atalǵanyn aıta ketken jón. Naqtylasaq, kórermender kózaıymy men «Operalyq rejıssýra ónerine jasampaz kózqarasy úshin» syılyǵyn aldy. Baıqaý úsh kezeńnen turdy. Birinshisinde olar arıamen, ekinshisinde dýetpen, úshinshisinde jappaı sahnamen jumys istedi. Qazylar alqasynyń nazaryna Erenbaq Toıkenov DjAkomo Pýchchınıdiń «Týrandot», Djoakkıno Rossınıdiń «Sevıldik shashtaraz» jáne Jorj Bızeniń «Karmen» operalarynyń ınterpretasıasyn usyndy.
"Bul óz aldyna úlken bir test, emtıhan desek bolady. Birinshiden, rejıser úshin tramplın. Osyndaı baıqaýlardan keıin usynystar kelip túsedi. Qazirdiń ózinde men basqa teatrlardyń usynystaryn estip jatyrmyn. Biraq tek naqtylanǵan soń baryp sizdermen bólisemin. Bul jerde eń mańyzdysy durys sózderdi tańdaý. Sebebi ýaqyt shekteýli, tek 10 mınýt beriledi, al jappaı sahnaǵa - 15 mınýt. Eń qıyny da osy, osy ýaqyt ishinde barlyǵyna úlgerý. Al qazylarǵa keler bolsaq, olar - óte tanymal rejıserler, kórkemdik jetekshiler, barlyǵy derlik halyq ártisteri. Bir sózben óz salasynyń maıtalmandary", - deıdi «Astana Opera» teatrynyń rejıseri Erenbaq Toıkenov.