Jas qazaqstandyqtar kóbinese oıyn-saýyq vıdeolaryn kóredi, oınaıdy, oqıdy jáne dostarymen hat jazysady.
«Kasperskıı zerthanasynyń» 2022 jyldyń birinshi toqsanyndaǵy zertteýiniń nátıjesi boıynsha, Qazaqstanda balalar YouTube jelisin jıi qoldanady, dep habarlaıdy Almaty-akshamy.kz
Kompanıa taratqan málimetke sáıkes, búginde balalar arasynda keńinen tanymal 10 qosymsha bar. Úsh aıdyń ishinde barlyq ýaqyttyń 30 paıyzy YouTube-ke ketken. Odan keıingi oryndarda WhatsApp (18%) pen TikTok (17%) tur.
Aldaǵy ýaqytta balalar ınternette odan da kóp otyrady. Sebebi jazǵy ýaqytta trafık kóbeıedi. Balalar oıyn-saýyq vıdeolaryn kóredi, oınaıdy, oqıdy jáne dostarymen hat jazysady. Osyǵan baılanysty «Kasperskıı zerthanasy» balalalardyń onlaın qaýipsizdigin qamtamasyz etýge keńes berip otyr. Búginde arnaıy tehnıkalyq quraldardyń arqasynda balanyń ınternette qansha ýaqyt otyrǵanyn bilip otyrýǵa bolady. Sondaı-aq qajetsiz kontentke shekteý qoıýǵa múmkindik bar.
«Al bala qalada jalǵyz ózi júrse, geolokasıanyń kómegimen júrgen jerin baqylap otyrýǵa bolady», - deıdi mamandar.
Aıta keteri, buǵan deıin Qazaqstanda TikTok qoldanýshylarynyń sany 7 mıllıon adamnan asty degen aqparat tarady.