Búginde «Saıahat» avtovokzaly men «Qulager» shaǵyn aýdanyndaǵy emhanalar jańǵyrtylyp, paıdalanýǵa berilgeli jatyr. Jumysshylar kentinde №33 emhana saqadaı-saı daıyn, ol Astana kúnine oraı ashylady, dep habarlaıdy almaty-akshamy.kz. 
Jetisý aýdany ákimdiginiń habarlaýynsha, birneshe jyl buryn aýdanda úsh emhana ǵana bolǵan. Medısınalyq qyzmetke qoljetimdilik qıyndaǵasyn jergilikti turǵyndar kórshiles Túrksib, Almaly jáne Medeý aýdandaryna qaralýǵa májbúr edi. Jetisý aýdanynda emhana salýǵa jer teliminiń joqtyǵy jaǵdaıdy qıyndatty. Máseleni sheshý úshin medısınalyq mekemege jaramdy ǵımarat izdeý bastaldy. Aýdan ákimi Gúlnár Kókebaeva máseleniń zańdy jaǵyn qolǵa alyp, birte-birte emhanaǵa jaramdy úsh ǵımarat satyp alyndy. 
Sonymen qatar, Kemel shaǵyn aýdanynda aýysymda 200 adam qabyldaıtyn otbasylyq-dárigerlik ambýlatorıa salyndy, ol qazir atalǵan shaǵyn aýdan turǵyndaryna qyzmet kórsetedi. Sondaı-aq, №11 emhanada kúrdeli jóndeý júrgizildi jáne KT men MRT qyzmeti bar óziniń dıagnostıkalyq ortalyǵyn ashty.
Osylaısha, Jetisý aýdanynyń halqy medısınalyq qyzmettiń qoljetimdiligimen tolyq qamtamasyz etiledi. 
Almaty ákimi Erbolat Dosaevtyń tapsyrmasymen qalada pasıentter men dárigerler úshin zamanaýı, jaıly jaǵdaı jasaýǵa erekshe kóńil bólinedi.
Aıta keteıik, Jetisý aýdanynyń ákimi laýazymyna Gúlnar Kókebaeva 2020 jyldyń qazan aıynda taǵaıyndalǵan bolatyn.