30 jeltoqsan kúni saǵat 15:00 - 00:00 aralyǵynda jalpy sany 29 reısti oryndaý josparlanǵan. Alaıda, onyń 21-i elordadaǵy qolaısyz aýa raıyna baılanysty keshiktirilse, 8 reıs keıinge qaldyryldy. Qazir Astana halyqaralyq áýejaıynda 2500-den astam jolaýshy óz reısin kútip otyr.
Aýa raıy saldarynan áýe joldary kestesiniń buzylýyna baılanysty QR Kólik mınıstri Marat Qarabaev jedel shtab quryp, Astana halyqaralyq áýejaıyna barlyq áýekompanıanyń ókilderin jınady. Arnaıy qurylǵan top pen áýekompanıa ókilderi jolaýshylar arasynda túsindirme jumystaryn júrgizip, saýaldaryna jaýap berip jatyr.
Áýejaıdaǵy jolaýshylar úshin Terminals Astana Airport Management basshylyǵy 2 myńnan astam porsıa ystyq tamaq pen ystyq sýsyn taratty. Reısteri keshikken jolaýshylardyń arasynda balalar men jasóspirimder bar. Olarǵa merekelik kóńil-kúı syılaý úshin Aıaz ata men Aqshaqar oıyn oınatyp, jańa jyldyq syılyqtar taratýda. Odan bólek, Astana qalasynyń ónerpazdary reısin kútip otyrǵan jolaýshylarǵa arnap ónerlerin kórsetýde. Barlyq jolaýshylar aýa-raıy qolaısyzdyǵynan oryn alǵan keleńsizdikke túsinistik tanytyp, barlyq suraqtaryna jaýap berip, qajetti kómek kórsetip jatqan mamandarǵa alǵystaryn bildirip jatyr.
Astana halyqaralyq áýejaıynyń áýeaılaǵy ashyq. Alaıda áýeaılaqtaǵy aýa raıy áli de ushý jáne qoný úshin qolaısyz. Sondyqtan áýekompanıalar reısterin keshiktirý jáne keıinge qaldyrý týraly sheshim qabyldaýda.
Áýejaı jolaýshylarǵa táýlik boıy qyzmet kórsetedi. Eger Siz 30-31 jeltoqsan kúnderi ushý josparlaǵan bolsańyz, reısińizdiń statýsyn áýejaıdyń nn-airport.kz resmı saıtynan qaraýǵa nemese 8(7172)702-999 nómiri boıynsha Call ortalyqqa habarlasýǵa bolady
#QR_Kólik_mınıstrliginiń_baspasóz_qyzmeti