Almaty qalasy Volonterler front-ofısi Jańa jyl merekesi qarsańynda, balalardy sergitý jáne olarmen qyzyqty ýaqyt ótkizý maqsatynda «Medeý» muz aıdynynda tegin kónkı tebý keshin uıymdastyrdy.
Sharaǵa «Januıa» jetim balalarǵa arnalǵan mamandandyrylǵan keshenniń 70-ke jýyq tárbıelenýshileri qatysty, dep habarlaıdy Almaty-akshamy.kz.
Volonterler balalarǵa «Medeý» muz aıdynyna tegin kirýmen qatar, tiskebasarlar men sýsyndar usyndy. Uıymdastyrýshylardyń aıtýynsha balalarǵa arnalǵan osyndaı shara aldaǵy ýaqytta jalǵasyn tabady.
«Búgingi is-shara arqyly biz balalar úıiniń tárbıelenýshilerin jańa jyl merekesimen quttyqtap, kóńil kúılerin kótergimiz keldi. Sondaı-aq aldaǵy ýaqytta jalǵyz basty zeınetkerler men múmkindigi shekteýli jandardy jańa jylmen quttyqtap, qaıyrymdylyq aksıalaryn uıymdastyrýdy josparlap otyrmyz», - dedi sózinde Almaty qalasy Volonterler front-ofısynyń jetekshisi Baǵdat Anarbaeva.
İs-shara sońynda tárbıelenýshilerdiń qýanyshynda shek bolmady. Balalar úıiniń tárbıeshileri óz kezeginde volonterlerge meıirimdi júrekteri men qamqorlyqtary úshin shynaıy alǵysyn bildirdi.
Aıta keteıik, atalmysh sharada balalardyń kóńil kúıin kóterip qana qoımaı, qaýipsizdigi úshin «QAMQOR CHARITY» qoǵamdyq qorynan 20-ǵa jýyq erikti tartyldy.