«Astana Balet» teatrynyń Dýbaıdaǵy gastróldik saparynyń shymyldyǵy jabyldy
Astanalyq teatr qazan aıynyń 27-30 kúnderi Dýbaı opera sahnasynda óner kórsetip, kórermen qaýymnyń yqylasyna bólendi. Gastróldik baǵdarlamany, ártisterdiń kásibı sheberligin joǵary baǵalaǵan kórermen zor qoshemetin bildirdi, dep habarlaıdy Almaty-akshamy.kz
«Biz Dýbaıda óner kórsetip, kórermen qaýym iltıpat tanytyp, qoshemetin bildirdi. Kórermen zalynda bos oryn bolmady. Kópten beri osy óńirde óner kórsetýge talpynǵanymyz ras, endi BAÁ jıi kelemiz degen úmittemiz. 9 jyl ishinde jınaqtalǵan teatr repertýary Birikken Arab Ámirlikteri turǵyndarynyń qyzyǵýshylyǵyn oıatyp, mádenıetterdiń toǵysýy, áldebir rýhanı úndestikke ulasaryna senimdimiz. Ártisterge, osy týrdy uıymdastyrýshylarǵa alǵysymyz sheksiz. Osy sahnada áli talaı óner kórsetemiz. Buǵan senim mol», – dedi «Astana Balet» teatrynyń dırektory Aleksandr Sovostánov.
Talǵamy bıik ónersúıer qaýymnyń nazaryna Shyǵystyń ǵajaıyp sulýlyǵyn pash etetin horeografıalyq týyndylar tartý etildi: ańyzǵa aınalǵan «Mahabbat týraly ańyz» spektakli men «Beıbarys sultan» baleti. «Astana Balet» teatry gastról shymyldyǵyn Arıf Melıkov mýzykasyna Iýrıı Grıgorovıch qoıǵan úsh kórinisti «Mahabbat týraly ańyz» baletimen ashty.
Sújet – kóne shyǵys ańyzyna negizdelgen. Spektákl názik, tamsandyrar plasıkalyq ıirimderden quralǵan biregeı horeografıa, sújet jelisi, ǵajaıyp kópshilik sahnalar men sezimge toly dýetterimen tań qaldyrady. Alǵash ret bul spektákl Marıınskıı, al keıin Úlken teatr sahnasynda kórsetilgen bolatyn.
Qazan aıynyń 29-30 kúnderi kórermen nazaryna «Beıbarys sultan» spektakli usynyldy. Egıpet pen Sırıanyń áıgili bıleýshisi Beıbarys sultan týraly spektákldiń qoıylymyna daryndy óner qaıratkerleri atsalysty: qoıýshy-horeograf – Qazaqstannyń eńbek sińirgen qaıratkeri Mýkaram Avahrı, kompozıtorlar – Hamıt Shańǵalıev pen Álibek Álpıev, lıbretto avtory – aqyn, Qazaqstannyń eńbek sińirgen qaıratkeri Baqyt Qaıyrbekov.
Aıta keterligi, «Astana Balet» teatry BAÁ alǵash ret gastróldik saparmen bardy. Buǵan deıin qazaqstandyq ujym AQSH, Fransıa, Italıa, Reseı, Qytaı, Belgıa men Japonıanyń áıgili sahnalarynda óner kórsetken.
Gastróldik sapar Táýelsizdigimizdiń 30 jyldyǵy aıasynda, Qazaqstan Respýblıkasy Mádenıet jáne sport mınıstriginiń qoldaýymen júzege asyryldy. Esterińizge sala keteıik, 6 qarashada «Astana Balet» teatrynda «Bir aktili baletter keshi» ótedi. Kesh barysynda ǵajaıyp bir aktili qoıylymdardy tamashalaı alasyz: Raımondo Rebektiń «Ótkenge saıahat» baleti, sonymen qatar, arnaıy shaqyrylǵan horeograf Rıkardo Amaranteniń eki týyndysy – «A Fuego Lento» jáne «Love Fear Loss».