Asqar Mamın Úkimet jumysy týraly esep berdi
QR Premer-Mınıstri Asqar Mamın Parlamenttiń eki palatasy depýtattarynyń birlesken otyrysynda Úkimettiń 2020 jylǵy jumysy jáne ekonomıkany odan ári damytý boıynsha qabyldanyp jatqan sharalar týraly esep berdi, dep habarlady Almaty-akshamy.kz. QR Úkimetiniń saıtyna silteme jasap.
Úkimet basshysy 2020 jyldyń qorytyndysy boıynsha naqty sektor Qazaqstan ekonomıkasy turaqtylyǵynyń negizgi faktoryna aınalǵanyn atap ótti. Álemdik jáne óńirlik ekonomıkalardaǵy belgisizdikke qaramastan, óńdeý salasy 3,9% deńgeıinde ósim kórsetti. 2004 jyldan beri alǵash ret óńdeý ónerkásibiniń úlesi (13,1%) JİÓ-degi taý-ken ónerkásibiniń úlesinen (12,5%) asyp tústi. Farmasevtıka 47%-ǵa ósýimen, daıyn metal buıymdary 20%-ǵa, mashına jasaý 16%-ǵa, onyń ishinde avtomobıl jasaý 53%-ǵa, vagondar men lokomotıvter óndirisi 39%-ǵa artý qarqynymen erekshelendi. Elimiz boıynsha turǵyn úıdi paıdalanýǵa berý 16,8%-ǵa ósip, 15,3 mln m² qurady, bul qurylysta senimdi ósimdi qamtamasyz etti (11,2%) jáne Qazaqstanǵa bir adamǵa jańa turǵyn úıdi berý boıynsha TMD elderi arasynda birinshi oryn alýǵa múmkindik berdi. Aýyl sharýashylyǵynda EAEO elderi arasynda eń joǵary ósim, sondaı-aq sońǵy 7 jyldaǵy eń joǵary kórsetkish baıqaldy. QR altyn-valúta rezervteri 23,1%-ǵa – $35,6 mlrd-qa deıin ósti.
Syrtqy saýdanyń oń saldosy $8,9 mlrd-ty qurady. Ulttyq ekonomıkany ındýstrıalandyrý aıasynda 2020 jyly 916 mlrd teńge somasyna 201 joba iske asyryldy. Jobalardyń basym bóligi AÓK, metalýrgıa, qurylys ındýstrıasy, mashına jasaý, hımıa ónerkásibinde júzege asyryldy. Bul 19 myń turaqty jumys ornyn qurýǵa jol ashty. Pandemıa kezeńinde tótenshe jaǵdaı rejımi men shekteý sharalary qoldanylǵan jaǵdaıda áleýmettik-ekonomıkalyq turaqtylyqty saqtaý úshin 2020 jyly daǵdarysqa qarsy sharalardyń 3 paketi qabyldanyp, iske asyryldy. Bul — halyq pen bıznesti qoldaýdyń shuǵyl sharalary, áleýmettik-ekonomıkalyq turaqtylyqty saqtaý jónindegi jedel sharalar, Ekonomıkalyq ósimdi qalpyna keltirý jónindegi keshendi jospar. Ekonomıkalyq ósimdi qalpyna keltirý máseleleri boıynsha zań qabyldandy, oǵan 14 kodekske jáne 9 baǵyt boıynsha 71 zańǵa túzetýler engizildi. Shaǵyn jáne orta bıznesti jeńildikpen nesıelendirý quraldary aıtarlyqtaı keńeıtildi. Aınalym kapıtalyn qarjylandyrý ulǵaıtyldy. Kredıtterdi jeńildikti sharttarmen qaıta qarjylandyrý, sondaı-aq kredıtter boıynsha tólemderdi keıinge qaldyrý usynyldy. Zardap shekken salalar úshin salyqtyq yntalandyrý sharalary qabyldandy. Jumyspen qamtý sharalarymen 1,4 mln qazaqstandyq qamtyldy. Zeınetaqylar men memlekettik járdemaqylardyń mólsherin 10-12% ındeksteý jumystary júrgizildi. Muǵalimderdiń eńbekaqysy 25%-ǵa, medısına qyzmetkerleriniń, sondaı-aq mádenıet jáne muraǵat isi qyzmetkerleriniń eńbekaqysy 50%-ǵa, quqyq qorǵaý jáne arnaıy qyzmet qyzmetkerleriniń eńbekaqysy 30-dan 70%-ǵa deıin ósti.
«Elimizdegi kúrdeli áleýmettik-ekonomıkalyq jaǵdaıǵa qaramastan, biz halyq aldyndaǵy barlyq áleýmettik mindettemelerdi oryndadyq», — dedi Asqar Mamın.
Bıylǵy 5 aıdyń qorytyndysy boıynsha Qazaqstannyń JİÓ 1,6%-ǵa ósti. Bul rette ekonomıkanyń barlyq salalarynda ósim qamtamasyz etildi. Negizgi draıverler óńdeý ónerkásibi (7,2%), onyń ishinde mashına jasaý (21,1%), hımıa ónerkásibi (9,8%), farmasevtıka (25,7%) jáne jeńil ónerkásip (5,5%) boldy. Qurylys sektorynda (11,3%) jáne turǵyn úıdi paıdalanýǵa berýde (12,5% nemese 4,6 mln m²) joǵary ósý qarqyny qamtamasyz etildi. Aýyl sharýashylyǵynda turaqty ósý qarqyny baıqalady (3,1%). Negizgi kapıtalǵa salynǵan ınvestısıalardyń ósýi taý-ken óndirisin esepke almaǵanda 25,5%-dy qurady. Ekinshi aı qatarynan kórsetiletin qyzmetter sektorynda – saýda (6,7%), baılanys (11,6%), jyljymaıtyn múlik operasıalary (1,3%), qarjy jáne saqtandyrý qyzmetinde (1,6%) kúsheıe túsken oń dınamıka baıqalady. Premer-Mınıstr Úkimettiń aldyna 2021 jyldyń qorytyndysy boıynsha ekonomıkalyq ósimdi 3,5-4,0% deńgeıinde qamtamasyz etý, sondaı-aq jumyspen qamtý sharalarymen 1,2 mln adamdy qamtý mindeti qoıylǵanyn atap ótti. Bul halyqtyń naqty tabysyn 5%-ǵa arttyrýǵa múmkindik beredi. Jalpy somasy 8 trln teńge bolatyn 415 ınvestısıalyq jobany iske asyrý maqsaty qoıyldy. 17 mln m² turǵyn úıdi paıdalanýǵa berý, 200 mektep salý jáne 30 medısınalyq mekeme ashý, 6 myń shaqyrym avtojoldy jóndeý jáne salý josparlanýda.
«Bizdiń aldymyzda qol jetkizilgen kórsetkishterdi odan ári nyǵaıtý jáne áleýmettik-ekonomıkalyq damýdyń jańa syn-tegeýrinderin eńserý mindeti tur», — dep atap ótti Asqar Mamın.