Asqar Mamın elordada sanıtarlyq-epıdemıologıalyq talaptardy kúsheıtýdi tapsyrdy
QR Premer-Mınıstri Asqar Mamınniń tóraǵalyǵymen ótken Úkimet otyrysynda eldegi sanıtarlyq-epıdemıologıalyq jaǵdaı qaraldy. Densaýlyq saqtaý mınıstri Alekseı Soı halyqty vaksınalaý barysy men qazirgi jaǵdaı týraly baıandady, dep habarlady Almaty-akshamy.kz QR Premer-Mınıstrdiń saıtynda jarıalanǵan habarǵa silteme jasap.
Qazaqstandaǵy sanıtarlyq-epıdemıologıalyq jaǵdaı turaqty jáne baqylaýǵa alynǵan. Vırýstyń reprodýktıvtik ındeksi 1 quraıdy, ınfeksıalyq tósek oryndar 25%, reanımasıalyq tósek oryndary 21% toly. Nur-Sultan qalasy áli de «qyzyl aımaqta» tur, «sary aımaqta» 5 óńir: Almaty jáne Shymkent qalalary, Atyraý, Batys Qazaqstan jáne Qaraǵandy oblystary ornalasqan. Qalǵan 11 óńir – «jasyl aımaqta». Búgingi tańda 2,8 mln-nan astam adam birinshi komponentti, 1,7 mln-nan astamy ekinshi komponentti aldy. Premer-Mınıstr elordada koronavırýstyń úndilik «Delta» shtammyna tán mýtasıanyń yqtımaldyǵy anyqtalyp otyrǵanyn, onyń taralý jyldamdyǵy óte joǵary, jyldam órshıtinin jáne saldary anaǵurlym aýyr ekenin atap ótti. Úkimet basshysy sanıtarlyq-epıdemıologıalyq jaǵdaıdy baqylaýda ustaýdy, Vedomstvoaralyq komısıaǵa elordadaǵy sanıtarlyq-epıdemıologıalyq talaptardy kúsheıtý boıynsha qosymsha sharalar qabyldaýdy tapsyrdy.
«Jalpy, Qazaqstandaǵy jaǵdaı turaqty bolǵanyna qaramastan, kórshi memleketterdegi jaǵdaı nasharlaı túsýde. Sondyqtan memlekettik shekarada baqylaýdy kúsheıtý kerek, sondaı-aq sanıtarlyq-epıdemıologıalyq normalardy qatań saqtaýǵa jáne vaksınalaý qarqynyn arttyrýǵa erekshe nazar aýdarý qajet», — dedi Asqar Mamın.