Qazaqstan Respýblıkasy Konstıtýsıasynyń qoldanysqa engizilgenine bıyl 27 jyl tolyp otyr. Osy kezeńde elimizdiń Negizgi Zańy – ornyqty, táýelsiz memleket qurýdyń, turaqty damý men jańa quqyqtyq keńistik qalyptastyrýdyń serpindi normatıvtik tuǵyryna aınaldy.
Ata Zańymyzda Qazaqstan Respýblıkasynyń árbir azamatynyń jeke bas bostandyǵy men quqyqtaryna kepildik berilgen. Biz elimizdiń osy basty tólqujatynyń arqasynda ózgelermen terezesi teń memleket qurdyq, halyqaralyq saıasat sahnasynda laıyqty oryn alyp, álemge tanyldyq, áleýmettik-ekonomıkalyq, quqyqtyq turǵyda ushan-teńiz jetistikke jetip, alǵa nyq qadam basyp kelemiz.
Konstıtýsıamyzdy halqymyz qurmet tutady. Konstıtýsıa boıynsha Qazaqstan Respýblıkasy ózin demokratıalyq, zaıyrly jáne quqyqtyq memleket retinde ornyqtyrady. Joǵaryda aıtqanymdaı, Ata Zańymyz azamattarymyzdyń ulttyq, azamattyq, áleýmettik, saıası quqyqtarynyń qorǵalýy men júzege asýynyń kepili bolyp otyr. Halyq memlekettik bıliktiń birden-bir qaınar kózi bolyp tabylady jáne ony tikeleı respýblıkalyq referendým, erkin saılaý arqyly, sondaı-aq óz bıligin memlekettik organdarǵa berý arqyly júzege asyrady.
Bıyl 5 maýsymda elimizde Ata Zańǵa tolyqtyrýlar men túzetýler boıynsha ótkizilgen jalpyhalyqtyq referendýmdy erekshe atap ótýimiz kerek. Bárimiz mańyzy erekshe tarıhı oqıǵanyń kýási boldyq. Qazaqstan halqy erikti túrde tarıhı tańdaýyn jasady. Konstıtýsıaǵa engiziletin ózgerister tuńǵysh ret jalpyhalyqtyq referendým nátıjesinde qabyldanyp, Jańa Qazaqstanǵa, ádiletti qoǵamǵa qaraı qadam bastyq.
Konstıtýsıalyq reformanyń iske asyrylýy jáne Jańa Qazaqstan qurý ıdeıasy elimizdi yntymaq, birlik, tatýlyqqa bastaıtyny sózsiz. Azamattardyń quqyǵyn qorǵaý máselesine kelgende, bizdiń Konstıtýsıamyz demokratıanyń barlyq talaptaryna saı keledi. Muny álemniń birqatar damyǵan elderi de moıyndap otyr.
Endigi másele, Konstıtýsıalyq reforma men zańnamanyń mańyzdylyǵy qazaqstandyqtarǵa, onyń ishinde jastarymyzǵa jyl on eki aı úzdiksiz aıtylýy qajet. Bul tek Konstıtýsıa kúni qarsańynda aıtylatyn másele emes. Ásirese, mektep qabyrǵasyndaǵy, bilim oshaqtaryndaǵy oqýshylar men stýdentterimizdiń sanasyna elimizdiń Negizgi Zańynyń baǵdarlaryn myqtap sińirsek, memleketimizdiń áleýeti alǵa basatyny anyq. Ár azamat óziniń quqyqtarymen qosa, mindetterin de jaqsy bilgeni qoǵam úshin de, memleket úshin de, adam úshin de birdeı tıimdi. Sondyqtan bul naýqandyq shara emes. Árbir mekemege kirgen kezde sol mekemeniń jumys aıasyna qatysty baptardy ilip qoıý qajet dep oılaımyn. Mysaly, emhananyń kireberisinde Konstıtýsıadaǵy densaýlyq saqtaý salasyna qatysty bap ilinip tursyn. Azamattarymyzdyń alǵashqy tegin medısınalyq kómek alýǵa quqyǵy bar ekeni jazylyp qoısyn. Bilim oshaǵynda bilimge qatysty, áskerı orynda qorǵanysqa qatysty baptar jazylsyn.
Ata Zańymyzdyń ómirimizdegi ornyn, rólin, mańyzyn osyndaı naqty istermen nasıhattaýymyz kerek. Sonymen qatar, elimizdiń árbir azamatynyń memleket múddesi jolyndaǵy paryzy men boryshtaryn túsindirý jumystary da qalys qalmaýy qajet. Túptep kelgende, árkim Qazaqstan Respýblıkasynyń Konstıtýsıasyn jáne zańdaryn saqtaýǵa, memlekettiń múddesin tuǵyrlatýǵa, otandastarynyń quqyqtaryn, bostandyqtaryn, abyroıy men qadir-qasıetin qurmetteýge mindetti. Jalpy, jańartylǵan Konstıtýsıa bizge memleketimizdiń táýelsizdigin ashyq demokratıalyq qaǵıdattar negizinde tuǵyrlatýǵa múmkindik bermek. Bul, ásirese, búgingi stýdent-jastarymyz úshin mańyzdy beles bolmaq. Al memleketshil, bilimdi, isker de bilikti jastarymyz búkil qoǵamnyń damýyna tyń serpin bereri sózsiz.