Qazaqstannyń áskerı qyzmetshileri bıyl Táýelsizdiktiń 30 jyldyǵynda 84 myńnan astam oqý-jattyǵýǵa qatysty
Bıyl Táýelsizdiktiń 30 jyldyǵynda armıanyń udaıy jaýyngerlik ázirligin qoldaý, áskerdiń jaýyngerlik eptiligin arttyrý, áskerı qyzmetshilerdi áleýmettik qamtamasyz etý jáne jeke quramnyń joǵary moraldyq-jaýyngerlik rýhyn qoldaý jóninde júıeli jumys júrgizildi, dep habarlaıdy Almaty-akshamy.kz
Áskerı qaýipsizdikti qamtamasyz etý salasynda qajetti strategıalyq jáne baǵdarlamalyq qujattar, atap óter bolsaq, 2021-2025 jyldarǵa arnalǵan Ulttyq qaýipsizdik strategıasynyń «Eldiń qorǵanys qabiletin nyǵaıtý» bólimi, el qorǵanysynyń jańa jospary qujattarynyń jıyntyǵy, Qarýly Kúshterdiń, basqa da áskerler men áskerı quralymdarynyń qurylysy men ony damytýdyń 2030 jylǵa deıingi jańa tujyrymdamasy ázirlendi.
Qarýly Kúshterdiń Joǵarǵy Bas qolbasshysynyń basshylyǵymen strategıalyq komandalyq-shtabtyq áskerı oqý-jattyǵý ótkizildi.
Áskerı vedomstvo qyzmetiniń basym baǵyty oq-dárilerdi qaýipsiz saqtaýdy qamtamasyz etý bolyp tabylady. Memleket basshysy «Qaýipsiz el» ulttyq jobasyn bekitti. Tyıym salynǵan aımaqtar men aýdandarǵa baılanysty qatynastar zań júzinde retteldi.
Áskerlerdi josparly túrde qaıta jaraqtandyrý aıasynda jańa jáne jańǵyrtylǵan qarý-jaraq pen áskerı tehnıkanyń úlesi artty.
Jeke quramnyń densaýlyǵyn saqtaýdy qamtamasyz etý maqsatynda koronavırýsqa qarsy vaksınalaý aıaqtalyp, revaksınalaý bastaldy.
«Uly dala áskeri – Táýelsizdik tiregi» uranymen áskerı qyzmetshiler 84,5 myń oqý-jattyǵý men jaýyngerlik oq atý jattyǵýlaryna qatysty, parashútpen 17,5 myńǵa jýyq sekirýdi, 762 jazǵy aýysymdy, 150 teńizge shyǵýdy, 1 200-den astam dalalyq joryqtardy oryndady.
«Altyn jebe» arnaıy operasıalar kúshterin keshendi tekserýi uıymdastyryldy.
2021 jyly Qazaqstan armıasynyń bólimsheleri «Qalqan» birlesken jedel-taktıkalyq, «Beket» keshendi, «Otpantaý» jedel-strategıalyq oqý-jattyǵýlaryna qatysty.
Halyqaralyq formatta qazaqstandyq áskerı qyzmetshiler UQSHU, SHYU, NATO aýmaǵynyń jáne eki segmentte Qytaımen, Pákistanmen, Reseımen, Ózbekstanmen jáne basqa da birqatar memlekettermen oqý-jattyǵýlarǵa qatysty.
Áskerıler shıelenisti jaǵdaıda Kabýldan azamattarymyzdy evakýasıalaý operasıasyn júzege asyrdy.
Qazaqstannyń áskerı qyzmetshileri Armıa halyqaralyq oıyndarynda tabysty jaýyngerlik saıys túrin kórsetti.
Qazaqstan kontıngentiniń BUU-nyń Lıvandaǵy bitimgershilik jáne Batys Saharadaǵy áskerı baqylaýshylar mısıasyna qatysýy jalǵasýda.
Áskerı qyzmetshilerdi áleýmettik qorǵaý memlekettiń basty basymdyqtarynyń qatarynda. Qazaqstan Prezıdenti Qasym-Jomart Toqaevtyń tapsyrmasy boıynsha 2021 jyldan bastap laýazymdyq jalaqy 35%-ǵa ósti. Jalaqynyń kezeńmen ósýi 2023 jylǵa deıingi aralyqty qamtıdy.
Zań júzinde rezervtegi qyzmetke, áskerı qyzmetshilerdi turǵyn úımen qamtamasyz etýge, materıaldyq-tehnıkalyq qamtamasyz etýge jáne basqa da ózekti máselelerge qatysty normatıvtik quqyqtyq aktilerge ózgerister men tolyqtyrýlar engizildi.
2021 jyly armıa sportshylary 110-nan astam mańyzdy halyqaralyq jáne respýblıkalyq sporttyq jarystarǵa qatysyp, 179 altyn, 99 kúmis jáne 89 qola medal oljalady.
2022 jyl Qazaqstan Respýblıkasy Qarýly Kúshteriniń qurylǵanyna 30 jyl bolyp jarıalandy. El áskerindegi jaýyngerlik saıystar «Qarýly Kúshterdiń 30 jyldyǵyna – bizdiń eren eńbegimiz!» uranymen ótedi.