Manevrler barysynda ekıpajdardyń daıyndyq deńgeıi jetildirildi
«Batyl toıtarys – 2022» oqý-jattyǵýy sheńberinde Áskerı-teńiz kúshteriniń áskerı qyzmetshileri korablderdi dıversıadan qorǵaý, teńiz mınalaryn zalalsyzdandyrý jáne kemelerdi tekserý sıaqty oqý-jaýyngerlik tapsyrmalaryn pysyqtady. Bul týraly Qorǵanys mınıstrliginiń baspasóz qyzmeti málim etti, dep habarlaıdy Almaty-akshamy.kz.
Kaspıı teńiziniń akvatorııynda ótken manevrlerdiń sońǵy kezeńinde Áskerı-teńiz kúshteri qolbasshylyǵynyń korablderi jaýyngerlik oqý-jattyǵýlar ótkizdi. Áskerı qyzmetshiler jaýyngerlik qoldaný aýdanynda AK-306 avtomatty korabldik artılerıalyq qondyrǵylarynan jáne «Ýtes» NSV iri kalıbrli pýlemetterinen sý ústindegi jáne áýedegi nysanalarǵa, ımıtasıalanǵan qarsylastyń dıversıalyq toptarynyń júzý quraldaryna jáne ushqyshsyz ushý apparattaryna is júzinde oq atýdy oryndady.
Áskerı teńizshiler Shekara qyzmetiniń bólimshelerimen ózara is-qımyl jasaı otyryp, zańsyz qarýlanǵan quralymnyń kemelerin basyp alyp, olardy tekserdi. «Alataý» mına-traldy korabliniń ekıpajy dıversanttarmen ornatylǵan zákirlik jáne túptik mınalardy zalalsyzdandyrýǵa arnalǵan is-qımyldaryn oryndady.
Bunymen qosa apatqa ushyraǵan kemege kómek kórsetý kezinde ekıpajdardy qutqarý is-qımyldaryna erekshe nazar aýdaryldy.
«Manevrler barysynda ekıpajdardyń daıyndyq deńgeıi jetildirilip, oqý-jaýyngerlik tapsyrmalardy oryndaý kezinde olardyń ózara is-qımyl jasaý tártibi pysyqtalady. Oqý-jattyǵý Qazaqstannyń Áskerı-teńiz kúshterine berilgen tapsyrmalardy oryndaýǵa jáne teńizde memlekettik múddelerdi qorǵaýǵa daıyn ekendigin kórsetti», - dep atap ótti Áskerı-teńiz kúshteriniń bas qolbasshysy kontr-admıral Sáken Bekjanov.
«Batyl toıtarys – 2022» vedomstvoaralyq strategıalyq komandalyq – shtabtyq oqý-jattyǵýy El Prezıdenti – Qarýly kúshterdiń Joǵarǵy Bas qolbasshysy Qasym-Jomart Toqaevtyń kúshtik qurylymdardy tıimdi úılestirýdi qamtamasyz etý, olardyń jedel jáne áskerı-tehnıkalyq úılesimdiligin jolǵa qoıý, sondaı-aq vedomstvoaralyq úılestirýdi kúsheıtý jónindegi tapsyrmalaryn iske asyrý aıasynda ótkizilip otyrǵanyn atap ótken jón.