Oqý-jattyǵýǵa Áskerı-Teńiz Kúshteriniń bas qolbasshysy Sáken Bekjanov basshylyq etýde.
Kaspıı teńiziniń qazaqstandyq sektorynda áskerı teńizshiler zymyran-artıllerıalyq korablder toptaryn jaýyngerlik jaǵdaıda qoldaný is-qımyldaryn pysyqtaýda, dep habarlaıdy Almaty-akshamy.kz QazAqparatqa silteme jasap.
«QR Qorǵanys mınıstrliginiń baspasóz qyzmetinen málim etkendeı, Qarýly Kúshterde jaýyngerlik oqý sharalary Qazaqstan Prezıdentiniń armıanyń jaýyngerlik qabiletin túbegeıli arttyrý jónindegi tapsyrmasyn iske asyrý sheńberinde ótkizilýde. Oqý-jattyǵýǵa Áskerı-Teńiz Kúshteriniń bas qolbasshysy, kontr-admıral Sáken Bekjanov basshylyq jasaýda», - delingen mınıstrlik málimetinde.
Manevrler barysynda ekıpajdardyń daıyndyq deńgeıi jetildirilýde. Sondaı-aq Kaspıı teńiziniń qazaqstandyq sektorynda eldiń aýmaqtyq tutastyǵyn, egemendigin jáne ekonomıkalyq múddelerin qorǵaý jónindegi mindetterdi oryndaýdaǵy ózara is-qımyl tártibi pysyqtalyp jatyr.
«Oqý-jattyǵýda teńizde apatqa ushyraǵan kemege kómek kórsetý boıynsha ekıpajdardyń qutqarý is-qımyldaryna erekshe nazar aýdarylǵan. Budan bólek, áskerı teńizshiler kemelerdi dıversıaǵa qarsy qorǵaý, ushqyshsyz basqarylatyn apparattar men shartty qarsylastyń katerlerine qarsy turý sharalaryn júrgizý ústinde», - dep naqtylady vedomstvodan.