Sarbaz óziniń últramarafonyn Otan qorǵaýshylar kúnine jáne Jeńis kúnine arnaıdy
Qorǵanys mınıstrligi Sport komıteti – Ortalyq sport klýbynyń áskerı qyzmetshisi efreıtor Baýyrjan Ábdihaıym Balqash qalasynyń mańyndaǵy Aqjal aýyly mańynan últramarafondy bastady, dep habarlaıdy Almaty-akshamy.kz.
Alǵan baǵyty Aqjal – Aqsý-Aıýly – Aqsý – Qaraǵandy – Osakarovka – Astana eldi mekenderi. Sportshynyń esebi boıynsha ol ózine kúnine júz shaqyrym júgirýdi mindettep otyr.
Ortalyq sport klýby komendanttyq vzvodynyń aǵa sarbazy Baýyrjan Ábdihaıym óziniń últramarafonyn Otan qorǵaýshylar kúnine jáne Jeńis kúnine arnaıdy. Altynshy kúni ol elimizdiń bas qalasy – Astanaǵa jetemin dep otyr.
Áskerı sportshy demeýshilerge, onyń ishinde marafondy tamaqtandyrýdy jáne medısınalyq qoldaýdy uıymdastyrǵany úshin «Han Sultan» sport klýbynyń ókilderine, qashyqtyqtaǵy qozǵalys qaýipsizdigin qamtamasyz etetin áskerı polısıa qyzmetkerlerine rızashylyǵyn bildirdi.
– Marafon ońaı bolmasy anyq. Degenmen, meniń mindetim – kúshimdi eseppen jumsap, tapsyrmany oryndaý. Eń bastysy, maǵan senim bildirgenderdiń, tálimgerler men áriptesterdiń úmitin aqtaýǵa tyrysamyn, – dedi sportshy.
Atalǵan últramarafondy Qazaqstandyq rekordtar kitabynyń ókilderi tirkeıtin bolady.