11 adam qylmystyq jaýapkershilikke tartyldy
«Áskerı qurylys» AQ basshylyǵy búdjet qarajatyn jymqyrdy degen kúdikke ilindi, dep habarlaıdy Almaty-akshamy.kz.
Sybaılas jemqorlyqqa qarsy qyzmet «Áskerı qurylys» AQ burynǵy prezıdenti E. Tájıdenovtiń jáne basqalardyń basshylyǵymen uıymdasqan qylmystyq topqa qatysty sotqa deıingi tergeýdi aıaqtady.
«11 adam qylmystyq jaýapkershilikke tartyldy. Onyń ishinde týǵan aǵasy men jıeni, sondaı-aq Tájıdenovtiń qaramaǵyndaǵy «Áskerı qurylys» JSHS men onyń Astana qalasy boıynsha fılıalynyń qarjylyq jáne korporatıvtik qyzmetine jaýapty qaramaǵyndaǵy adamdar bar», - dep atap ótti Antıkor ókilderi.
Olar taýarlar men qyzmetterdi satyp alýǵa, óteýsiz qarjylyq kómek kórsetýge úlestes kompanıalarmen jalǵan sharttar jasasý arqyly asa iri kólemde búdjet qarajatyn jymqyrdy dep kúdiktenedi,-dep jazady Azattyq Ruhy.
«Zalaldyń jalpy somasy 596 mln teńgeni quraıdy. Ony óteý maqsatynda qylmystyq jolmen alynǵan múlikke tyıym salyndy», - delingen habarlamada.
Qazirgi ýaqytta aıyptalýshylar sotqa berildi.
«Konstıtýsıanyń 77-baby 3-tarmaǵynyń 1-tarmaqshasyna jáne Qylmystyq-prosestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», - dep eskertedi vedomstvo ókilderi.