Mereke qarsańynda «Nurly jol» temirjol vokzaly men «Qazmedıa ortalyǵy» teleradıokesheninde QR Qarýly kúshteri Ulttyq áskerı-patrıottyq ortalyǵy Ortalyq áskerı orkestriniń konsertteri ótti.
Halyqaralyq áıelder kúnine arnalǵan is-shara jolaýshylardy beı-jaı qaldyrmady. Áskerı qyzmetshiler áıelderge shokolad pen kóktemniń sımvoly qyzǵaldaq syılady, dep habarlaıdy aqshamnews.kz.
– Elordanyń halyq kóp jınalatyn alańdarynda óner kórsetý jaqsy dástúrge aınaldy. Búgin biz 68665 áskerı bóliminiń qurmet qaraýyl rotasymen birlesip, ájelerimizdi analarymyz ben ápkelerimizdi merekemen quttyqtadyq. Dástúr boıynsha biz áskerı-patrıottyq ánderdi, marshtar men kópshilikke tanymal áýenderdi oryndadyq. Barlyq áıel-analarǵa baqyt tileımin, – dedi Ortalyq áskerı orkestrdiń dırıjeri aǵa serjant Abzal Imanǵalıev.
Tyńdaýshylar Ulttyq áskerı-patrıottyq ortalyq shyǵarmashylyq ujymynyń ónerin jyly qabyldady.
– Jumysta júrip, merekeni umytyp ketip jatamyz. Búgin áskerı mýzykanttardyń arqasynda biz merekelik kóńil-kúıdi sezine aldyq. Áskerı qyzmetshilerdiń mýzykalyq tartýy bizdi shabyttandyryp, jarqyn emosıa syılady. Barshańyzǵa beıbitshilik, jaqsylyq pen amandyq tileımin, – dedi «Habar» agenttiginiń Abaı oblysyndaǵy menshikti tilshisi Botagóz Dandybaeva.
Qurmet qaraýyl rotasynyń áskerı qyzmetshileri saptyq defıle oryndap, jolaýshylardy qımyl úılesimdiligimen tań qaldyrdy.
– Nemerem ekeýmiz Jezqazǵanǵa bara jatyrmyz. Mine, osyndaı keremet konsertke kýá boldyq. Áskerı qyzmetshilerge merekelik kóńil-kúı syılaǵany úshin rahmet aıtamyn, – dedi Sáýle Jandildına.
Kórermender mýzykanttar men solıserge úlken qoshemet kórsetti. Al mýzykanttar úshin jolaýshylardyń rızashylyǵy eń jaqsy marapat boldy.