QR Qorǵanys mınıstrligi qorǵanys vedomstvosy basshysynyń «2024 jyly áskerı mindettilerdi áskerı jıyndarǵa shaqyrý týraly» buıryǵynyń jobasyn ázirledi.
Normatıvtik quqyqtyq akt «Áskerı qyzmet jáne áskerı qyzmetshilerdiń mártebesi týraly» QR Zańy 33-babynyń 1) tarmaqshasyna sáıkes daıyndaldy. İs-sharalardy áskerı basqarý organdary, áskerı daıyndyq jónindegi ýákiletti memlekettik organdar áskerı mindettiler men azamattardyń bilimin jetildirý maqsatynda, sondaı-aq el zańnamasynda kózdelgen ózge de jaǵdaılarda júrgizedi.
Jıyndardyń maqsaty – beıbit ýaqytta qysqartylǵan kólemde ustalatyn áskerı bólimderdiń jaýyngerlik jáne jumyldyrý daıyndyǵyn arttyrý, jumyldyrý jáne olardy soǵys ýaqytynda jasaqtaý aýdandarynda jasaqtaý kezinde Qarýly kúshterdi, basqa da áskerler men áskerı quralymdardy óristetýge qajetti áskerı-oqytylǵan resýrstardy daıyndaý jáne zapasta jınaqtaý.
30 kúndik áskerı jıyndar 2007 jyldan bastap jyl saıyn ótkizilip keledi. Jıyn kezinde áskerı mindettilerdiń jumys orny men atqaratyn laýazymy saqtalady. Olarǵa ortasha jalaqy, al jumyssyzdarǵa memleket esebinen eń tómengi jalaqy tólenedi. Áskerı mindettilerdi temirjol nemese avtomobıl kóligimen tasymaldaý, olardy tamaqpen qamtamasyz etý QR Qorǵanys mınıstrliginiń qarajaty esebinen júzege asyrylady. Budan bólek áskerı jıyndarǵa shaqyrylǵan barlyq áskerı mindettiler áskerı mindettilerdiń tıisti sanattary úshin belgilengen normalarǵa sáıkes zattaı múlikpen jáne áskerı qyzmetshilermen teń dárejede medısınalyq qyzmetpen qamtamasyz etiledi. Jıynǵa shaqyrylǵan barlyq áskerı mindettiler kazarmalyq jaǵdaıda bolady. Olardy bólimniń ornalasqan jerinen seıilge shyǵýyn rota komandırleri ishki qyzmet jarǵysynda belgilengen tártippen júrgizedi.
Áskerı tártip pen qoǵamdyq tártipti buzǵany, qylmys jasaǵany, sondaı-aq memleketke keltirgen materıaldyq zalaly úshin áskerı jıyndarǵa shaqyrylǵan áskerı mindettiler eldiń zańnamasyna sáıkes jaýapqa tartylady. Áskerı mindettilerdiń áskerı jıyndardan jaltarýy Ákimshilik quqyq buzýshylyq týraly kodekske sáıkes bes aılyq eseptik kórsetkish mólsherindegi aıyppul salýǵa ákep soǵady.
Buıryq jobasynyń tolyq mátinimen «Elektrondyq úkimet» portalynda «Ashyq NQA» bóliminde aǵymdaǵy jyldyń 23 qańtaryna deıin myna silteme boıynsha tanysýǵa bolady: https://legalacts.egov.kz/npa/view?id=14887705