2024 jyldyń birinshi qańtarynan bastap pılottyq joba aıasynda 17 jasar balalardy áskerı esepke qoıý avtomatty túrde júrgiziledi.
Qorǵanys vedomstvosynyń bastamasyn Premer-Mınıstr, múddeli memlekettik organdar, Astana, respýblıkalyq mańyzy bar qalalar men oblystardyń ákimdikteri qoldady, dep habarlaıdy Almaty-aksamy.kz.
QazAqparat málimetinshe, ony iske asyrý memlekettik organdardyń aqparattyq júıelerin modıfıkasıalaý men yqpaldastyrýdyń arqasynda múmkin boldy. Bul elimizdiń 16-60 jas aralyǵyndaǵy azamattaryn áskerı esepke alýdyń tolyq qamtylyp júrgizilýine múmkindik berdi.
Qoldanystaǵy zańǵa sáıkes jyl saıyn on jeti jasqa tolatyn er azamattardy tirkeý júrgiziledi. Mundaı prosedýra áskerı qyzmetke jaramdylyq deńgeıin anyqtaı alady.
«Osyǵan baılanysty densaýlyq saqtaý uıymdary bir aılyq balalardan bastap 18 jasqa deıingi balalardy keıinnen dınamıkalyq baqylaýmen jáne saýyqtyrýmen profılaktıkalyq medısınalyq tekserýlerdi júzege asyrady. Bul rette jalpy praktıka dárigerleri beıindi mamandardyń qorytyndysyn jáne zerthanalyq-dıagnostıkalyq zertteýlerdi eskere otyryp, 15 pen 18 jas aralyǵynda balalardyń densaýlyq jaǵdaıyna keshendi baǵalaý júrgizedi. Mundaı derekter Qorǵanys mınıstrligimen biriktirilgen Densaýlyq saqtaý mınıstrliginiń aqparattyq júıesinde kórsetiledi», - dep habarlaıdy Qorǵanys mınıstrliginen.
Jyl saıyn 120 myńǵa jýyq 17 jasar bala áskerı esepke alynady. Qyzmetti avtomattandyrý shaqyrý ýchaskelerine tirkeýdi uıymdastyrý jáne júrgizý úshin jergilikti atqarýshy organdarǵa jyl saıyn bólinetin mıllıard teńgeden asa búdjet qarajatyn únemdeýge múmkindik beredi. Al únemdelgen qarajat medısınalyq komısıa múshelerine eńbekaqy tóleý, shalǵaıdaǵy aýyldyq okrýgterden jastardy áskerı komısarıattarǵa aldyrý, keńse taýarlary jáne t. b. qyzmetterge jumsalatyn bolady.