Jambyl oblysyndaǵy áskerı bólimdegi jarylystan keıin evakýasıalanǵan aýyl turǵyndary búgin úıine qaıtarylady. Bul týraly Jambyl oblysynyń ákimi Berdibek Saparbaev málimdedi, dep habarlaıdy almaty-akshamy.kz
«Jarylys bolǵan jerge jaqyn ornalasqan 3 eldi meken bar. Onyń eń jaqyny Qaınar aýyly 1 shaqyrym jerde. Al qalǵan ekeýiniń qashyqtyǵy 5 shaqyrymdy quraıdy. Osy úsh eldi mekende 718 adam turady. Keshe ol kisilerdiń barlyǵy basqa jerlerge, ıaǵnı biz daıyndaǵan 10 mektepke jáne 5 kolejdiń jataqhanalaryna ornalastyryldy. Sońynda olardan 227 adam qaldy. Al qalǵandary aǵaıyn-týysqandaryna ketti», - dedi oblys basshysy Jambyl óńirlik komýnıkasıalar qyzmetindegi baspasóz máslıhaty barysynda.
Sonymen qatar ol búgin tańerteń evakýasıalanǵan adamdarǵa baryp, jaǵdaılaryn bilgendigin atap ótti. «Olar tıisti kómekpen, ıaǵnı tamaq, sýsynmen qamtamasyz etilgen. Endi jalpy jaǵdaıǵa qarap, barlyǵy durys dep sheshilse, onda búgin olardyń barlyǵyn úılerine qaıtaramyz», - dedi Berdibek Saparbaev.