Shaqyrý qaǵazyn alǵan azamattar shaqyrý komısıasyna kelmeıdi
Qorǵanys mınıstrligi áskerı komısarıat qyzmetkerlerinen tereze arqyly qashqan kolej stýdentteriń áreketine qatysty pikir bildirdi, dep habarlaıdy Almaty-akshamy.kz.
Áleýmettik jelilerde «Áskerge áketpek bolǵan komısarıat qyzmetkerlerinen tereze arqyly qashyp bara jatqan kolej stýdentteri», degen mátini bar vıdeo tarady. Beınematerıalda aıtylǵandaı, bul jaǵdaı stýdentterdiń dıplom qorǵaý sátinde bolǵan.
Osy jaǵdaıǵa baılanysty Qorǵanys mınıstrligi áskerı qyzmetke shaqyrýǵa jatatyn azamattar jergilikti basqarý organynyń shaqyrý qaǵazy boıynsha kelýge mindetti ekenin habarlady. Shaqyrý qaǵazyn jergilikti áskerı basqarý organdarynyń ókilderi azamattyń jeke ózine nemese jumys, oqý ornynyń uıym basshysyna tapsyrady.
«Bul oqıǵa osydan shamamen 10 kún buryn bolǵan. Onyń nege sońǵy birneshe kúnde bulaı tarap ketkenin bilmeımiz. Biz ol áskerge shaqyrylǵan jastar men olardyń ata-analarymen sóılestik. Olar dıplom alyp jatqan túlekter. Sondyqtan olar oqýdy aıaqtaǵan bolyp sanalady. Tıisinshe medısınalyq tekseristen ótý úshin kelýge mindetti. Olardy áskerı komısarıat qyzmetkerleri kúshtep áketpeıdi. Tek olardy medısınalyq tekseriske shaqyrǵan», - dep málim etti mınıstrliktiń baspasóz qyzmeti.
Vedomstvo málimetinshe, azamattardy áskerge shaqyrý jumystaryn uıymdastyrý, oryndaý jergilikti ákimdikterge júkteledi. Sonymen qatar mnıstrlik merzimdi áskerı qyzmetke irikteý birneshe kezeń boıynsha júrgiziletinin atap ótti. Áýeli azamat medısınalyq tekserýden, keıin psıhologıalyq irikteýden jáne áskerı basqarmanyń ókilderimen áńgimelesýden ótedi.
«Tájirıbe kórsetkendeı, áskerge shaqyrylǵandar men olardyń ata-analary zańnama talaptaryn elemeıdi. Shaqyrý qaǵazyn alǵan azamattar shaqyrý komısıasyna kelmeıdi. Al olardy májbúrlep ákelý múmkin emes. Sondaı-aq zańǵa sáıkes shaqyrý qaǵazyn azamattyń jeke ózine tapsyrý múmkin bolmaǵan jaǵdaıda onyń kelýin qamtamasyz etý mindeti İshki ister organyna júkteledi», - dep habarlady vedomstvo.
Qorǵanys mınıstrliginiń málimetinshe, oqý ornynyń basshylyǵymen kelisilgen tártipte oqýdy támámdap jatqan túlekterge túsindirý jumystary júrgizilýde. Sonymen qatar olardyń áskerı qyzmetke jaramdylyǵyn anyqtaý úshin medısınalyq komısıaǵa shaqyrý qaǵazdary tapsyrylyp jatyr.