Jeńimpazdar daýys berý arqyly anyqtaldy
Marapattaý Astanadaǵy Qarýly kúshterdiń Ulttyq áskerı-patrıottyq ortalyǵynda ótti, dep habarlaıdy Almaty-akshamy.kz.
8 naýryz merekesine arnalǵan baıqaýǵa áskerı qyzmetshi áıelderdiń saýalnamalary men fotosýretteri bar 50-den astam ótinim kelip túsken bolatyn. Qorǵanys mınıstrliginiń resýrsyna baıqaý sharttarynda bekitilgen tehnıkalyq talaptarǵa jaýap beretin 26 fotosýret iriktelip alyndy.
Jeńimpazdar Qorǵanys mınıstrliginiń https://instagram.com/modgovkz resmı paraqshasynda daýys berý arqyly anyqtaldy. «Ásker arýy» fotobaıqaýy áskerı qyzmetshilerdiń sulýlyǵyn ǵana emes, sonymen qatar baıqaýǵa qatysýshylar ıgergen mamandyqtardyń alýan túrliligin de kórsetti.
Bas júldege Áýe qorǵanysy kúshteri bas qolbasshysy basqarmasynyń baspasóz hatshysy aǵa leıtenant Ásem Ábdiraıymova (5,7 myń lúpil) ıe boldy. Ol 2023 jylǵy prezıdenttik kópsaıystan Qarýly kúshter chempıonatynyń júldegeri, sondaı-aq qalalyq voleıbol áýesqoılary lıgasynyń júldegeri atanǵan «Diamond» voleıbol komandasynyń kapıtany.
Lúpilder sany boıynsha taǵy úsh oryn anyqt anyqtaldy. Birinshi oryndy Abaı óńirlik garnızony áskerı polısıa basqarmasy áskerı polısıa bóliminiń mamany efreıtor Kamıla Omarbekova (4,8 myń lúpil) jeńip aldy. Ekinshi oryn Qostanaı oblysy Rýdnyı qalasynyń qorǵanys isteri jónindegi bóliminiń esepke alý jáne jumyldyrý resýrstary qyzmetiniń bastyǵy aǵa serjant Adıa Nurpeıisovanyń (3,2 myń lúpil) enshisinde. Úshinshi oryndy 54380 áskerı bólimi baılanys torabynyń maman-mehanıgi efreıtor Ázıza Ábdiraıymova (3,1 myń lúpil) ıelendi.
Jeńimpazdar men júldegerler fotokonkýrs atrıbýttary bar dıplomdarmen jáne kádesyılarmen marapattaldy.