Aısultan Seıitovtiń «QASH» fılmi Asian Pacific Screen Awards syılyǵynyń «Úzdik fılm» jáne «Úzdik operatorlyq jumys» nomınasıalaryna úmitker atandy, dep habarlaıdy almaty-akshamy.kz Qara production-ǵa silteme jasap.
Marapattaý rásimi 3 qarashada Aýstralıanyń Gold-Kost qalasynda ótedi. 2007 jyly qurylǵan, bedeldi Asia Pacific Screen Awards marapaty Azıa-Tynyq muhıty aımaǵyndaǵy 70-ten astam el men aımaq rejıserleriniń jumysyn kórsetedi.
«QASH» fılminde 1930 jyldardaǵy jappaı asharshylyq týraly baıandalǵan. Fılm sújeti boıynsha qabir qazýshy Isataı óz aýylyn qutqarýǵa attanady. Sheksiz dala túnekke aınalyp, Isataıdyń sanasyn eki kúsh – keńistik pen ashtyq bıleıdi.
Buǵan deıin fılm 25-shi Shanhaı kınofestıvalinde «Úzdik rejıser» atalymyna ıe boldy. Sondaı-aq Qazaqstan kınosynshylar qaýymdastyǵynyń «Úzdik debút», «Ekinshi plandaǵy úzdik áıel róli», «Úzdik mýzyka» jáne «Úzdik fotorejısser» nomınasıalarynda jeńiske jetti.