Maýsym aıynda qalamyzdyń kóptegen bıznes nysandary turǵyndardyń KVI-ge shaldyǵý kórsetkishiniń deńgeıin kórsetetin Ashyq júıesine qosyla bastady.
Búgin Almaty qalasy Óńirlik komýnıkasıalar qyzmetiniń alańynda ótken «Ashyq jobasynyń máseleleri» taqyrybynda onlaın baspasóz-konferensıasynda osy júıe týraly suraqtarǵa Almaty qalasy Kásipkerler palatasy dırektorynyń quqyqtyq máseleler jónindegi orynbasary Saltanat Lesbaeva jaýap berdi, dep habarlaıdy Almaty-akshamy.kz.
«Eń basty paıdasy – qaýipsizdik, aýrý juqtyrýdyń qaýpin tómendetý. İndettiń órship turǵanyn bárimiz bilemiz. Biraz ýaqyt qatań karantındik shekteý tártibinde jumys istedik. Kóptegen bıznes nysandarynyń jumysyna tyıym salyndy. Osy turǵydan qaraǵanda, «Ashyq» júıesi - juqtyrý qaýpin tómendetetin qosymsha qural jáne bıznestiń qaıta jandanýyna kómek beretin múmkindik. Bul tek bıznes nysandaryna ǵana emes, kelýshi halyqqa da paıdaly qosymsha, óıtkeni mundaı júıege qosylǵan nysanǵa «qyzyl», «sary» statýstaǵy adamdardyń kire almaıtynyn bilesiz, ıaǵnı ózińizdi qaýipsiz sezinesiz», - dedi spıker.