Bílím nysandaryndaǵy balalar qauípsízdígí – basty nazarda.
Almaty oblysynda balalardyń qauípsízdígín qamtamasyz etu maqsatynda barlyq mektepter, yaǵnı 760 mektep, 186 balabaqsha jáne 43 kolledj tolyǵymen beınebaqylau kameralarymen qamtylǵan, dep habarlaıdy Almaty-akshamy.kz oblys ákímíníń baspasóz qyzmetíne sílteme jasap.
Qazír osy kameralardy jedel basqaru ortalyǵyna baılanystyru jūmystary júríp jatyr. Būl turaly búgín Premer-Mınıstr Asqar Mamınníń tóraǵalyǵymen selektorlyq rejımde ótken Úkímet otyrysynda bílím beru obektíleríníń qauípsízdígín qamtamasyz etu turaly oblys ákímí Amandyq Batalovtyń bayandamasynda aıtyldy.
Jalpy, Almaty oblysynda 760 jalpy bílím beretín memlekettík mektepte 428 myń oqushy bílím aluda. Oblys ákímí balalardyń qauípsízdígín qamtamasyz etu úshín barlyq mektepter men balabaqshalarda jáne kolledjderde jalpy sany 989 kamera ornatylǵanyn aıtty. Alaıda, būl kameralar jedel basqaru ortalyǵyna shyǵarylmaǵan. Osyǵan baılanysty óńírde mektepterdegí qauípsízdík júıesín standartqa sáıkes jańǵyrtu jūmystary bastaldy.
«Bıylǵy jyly oblystyq mańyzy bar Taldyqorǵan, Tekelí jáne Qapshaǵaı qalalarynyń 47 mektebíníń beınebaqylau júıesí jańartylyp, polıtsıya departamentíníń jedel basqaru ortalyǵyna shyǵarylady. Būl maqsatqa oblystyq byudjetten 250 mln. teńge bólíndí. Sondaı-aq osy mektepterde 187 mln. teńgege baqylau júıesí bar turnıketter ornatylady jáne mektepterdí mamandandyrylǵan kúzet kompanıyalary kúzetetín bolady», - dedí Amandyq Batalov.
Bayandamashynyń sózíne súıensek, bıyl oblys mektepterín 100 paıyz «dabyl túımelerímen» qamtamasyz etu úshín byudjetten 106,4 mln. teńge qaralǵan. Al 2022 jyldyń sońyna deıín 713 mektepte qauípsízdík júıelerí jańartylatyn bolady.
Óńírde 743 jalpy bílím beretín mektep jyly dárethanalarmen qamtamasyz etílgen, qalǵan 17 dárethana bıylǵy jyldyń sońyna deıín jóndeledí.
Amandyq Batalov oqushylardyń arasynda bullıngten qorǵanu jónínde aldyn alu jūmystaryn júrgízu úshín jergílíktí byudjetten 30 mln. teńge bólíngenín atap óttí. Sol sıyaqty kámeletke tolmaǵandarǵa shūǵyl eksperımenttík-psıhologıyalyq keńes beru úshín 21 jūmys toby qūrylǵan. Osy jerde aıta ketsek, «Resurs» balalardyń psıhıkalyq jaǵdaıyn dıagnostıkalaudyń avtomattandyrylǵan júıesí arqyly 7-11 synyptardyń 99 myńǵa juyq oqushysy kompyuterlík testíleuden ótken, sondaı-aq 1084 pedagog-psıholog qaıta dayarlau kurstarynda oqytyldy.
Sonymen bírge balalardyń qauípsízdígín qamtamasyz etu úshín oblysta sońǵy ekí jylda 940 mln. teńgeden astam somaǵa oqushylar tasymaldaıtyn 71 jańa zamanauı úlgíde jabdyqtalǵan avtobustar satyp alynyp berílgen.
