Azyq-túlik qaýipsizdigin qamtamasyz etý úshin Aýyl sharýashylyǵy mınıstrligi mal sharýashylyǵy ónimderiniń tolyq qadaǵalanýyn qamtamasyz etý jumystaryn júrgizýde, dep habarlaıdy almaty-akshamy.kz vedomstvonyń baspasóz qyzmetine silteme jasap.
Aýylsharýashylyǵy janýarlaryn tekserissiz soıýǵa jol bermeý maqsatynda aldymen veterınarıalyq tekserýdi jáne soıýdan keıingi veterınarıalyq-sanıtarıalyq saraptamany ótkizý úshin «Etti veterınarıalyq-sanıtarıalyq saraptaý» modýli ázirlendi.
Júıe soıý jáne ishki saýda obektilerinde veterınarıalyq-sanıtarıalyq saraptamadan ótkennen keıin saraptama aktisin berýdiń bıznes-prosesterin avtomattandyrady, sondaı-aq janýardyń tolyq ómirlik sıkli týraly aqparaty bar QR-kodty qalyptastyrady. Bul QR et satý oryndarynda ornalastyrylady, maldardy veterınarlyq tekserýsiz jáne ushalar men aǵzalardy saraptamasyz soıýdyń aldyn alýǵa múmkindik beredi.
Qazirgi tańda joba iske qosylyp, barlyq oblystar men respýblıkalyq mańyzy bar qalalarda jumys isteýde. Oǵan 1664 mal soıý orny, veterınarlyq-sanıtarlyq saraptama zerthanalary, saýda oryndary qosylǵan. Júıede 1470-ten astam veterınar, Veterınarıalyq-sanıtarıalyq saraptama zerthanasynyń qyzmetkeri jáne memlekettik veterınarıalyq-sanıtarıalyq ınspektorlar tirkelgen.
QR-kod arqyly 117 myńnan astam veterınarıalyq anyqtama blankileri jáne 438 myń saraptama qorytyndysy shyǵaryldy.
Júıe Reseı Federasıasymen shekaralas Sharbaqty veterınarlyq baqylaý pýnktinde synaqtan sátti ótti.